TVB台慶劇《香港人在北京》今晚（20號）播出第10集，最大亮點絕對係劇本殺場口，一眾演員扮鬼扮馬，以經典電影造型亮相。「徐港仁」陳展鵬同「Helen姐」吳若希（Jinny）分別 以王祖賢主演電影《倩女幽魂》造型上陣，展鵬戴U形假髮化身黑山老妖大晒喜感，Jinny穿上白色古裝化身聶小倩。「蘇菲」蔡潔穿旗袍以《花樣年華》造型現身，加上一頭懷舊波浪頭，女人味十足。 
劇中處於愛情錯摸嘅「石磊」吳業坤同「寶怡」戴祖儀（Joey）以周星馳電影《功夫》包租公、包租婆造型亮相。外形甜美嘅Joey戴上爆炸頭假髮及扮大鼻哥窿，成功滲出師奶味，坤哥黐上假鬍鬚及電鬈髮還原元華造型。
另邊廂，陷入愛情三角錯嘅「阿喱」洪永城（Tony）、「Funny」傅嘉莉（Kelly） 及「淼淼」陳星妤同樣以周星馳電影造型登場。星妤穿水手裝校服兼鬢孖辮化身《喜劇之王》張栢芝飾演嘅柳飄飄，初戀味濃！
洪永城同傅嘉莉一齊玩轉《食神》，Tony 穿上金黃色廚師衫化身食神，傅嘉莉戴假哨牙兼喺臉上畫刀疤神還原火雞姐經典造型，與「本尊」莫文蔚相似度直達 99%，傅嘉莉受訪時透露由入行做Model開始，有不少人指佢似莫文蔚：「冇諗過拍劇扮佢（莫文蔚）其中一個經典角色，拍攝時我覺得好似樣，戴埋假牙之後直頭係火雞姐，見到還原度咁高，我自己都好開心！」提到呢場戲要戴假哨牙講對白，傅嘉莉坦言一啲都唔簡單：「假牙只係 Halloween嘅道具，好闊同好大，所以好難戴，後尾諗到擺啲Blu Tack 去黐住原本啲牙，盡量飲少啲水減少口水，怕一講對白會甩出嚟搞到NG。」傅嘉莉今次打破咗佢以往角色嘅框框，佢完全唔介意演男仔頭。
台慶劇《香港人在北京》逢周一至五晚9點30分翡翠台播映