一共10集嘅文化節目《典籍裡的中國》將於10月21號起逢周六晚9點半翡翠台播映，被視為央視重點文化類創新節目《典籍裡的中國》喺內地播映時贏得極高口碑，被讚係「綜藝天花板」，每次穿越讓人無比動容。
《典籍裡的中國》以嶄新手法重新包裝經典中華文化典籍，節目中內地主持撒貝寧將以「現代說書人」身份，帶領觀眾沉浸式體驗十大經典文化典籍，分別為《尚書》、《史記》、《本草綱目》、《論語》、《孫子兵法》、《楚辭》、《徐霞客遊記》、《道德經》、《周易》及《傳習錄》。撒貝寧每集典籍進行導讀，更會穿越時光隧道直闖每集典籍嘅歷史舞台，喺舞台上欣賞過百名演員精湛演出，更與故事主角互動，藉此帶出每集典籍嘅核心思想，以及成書同流傳等歷史背景。《典籍裡的中國》演員陣容絕對不容忽視，有具份量嘅資深演員及內地舞台劇演員坐鎮，包括金馬及金雞「最佳男配角」王學圻、金馬影帝吳鎮宇及金雞影后奚美娟等，吳鎮宇將喺《孫子兵法》飾演孫武。
聽晚翡翠台首播《典籍》係經重新包裝嘅香港版本，全部內容以廣東話重新配音。首集內容講述《尚書》，先後涵蓋商末周武王姬發領軍伐紂牧野誓師，及西漢伏生護書等重大事件，宏偉壯觀兼會轉動嘅舞台、配以台上無縫銜接嘅演員互動，絕對係影視新體驗！
節目有「多功能」吳沚默（Momo）及「萬能鍾」鍾志光（鍾仔）攜手擔任主持，鍾仔文學根底相當紮實深厚，鍾仔以「講波佬」及《愛‧回家之開心速遞》初戀Cafe老闆「佳叔」成功入屋，擁有香港大學中國語文及文學碩士，及中文大學哲學文學碩士雙碩士學歷；至於 Momo 除咗係《老表》系列編劇，曾推出散文集《漂流宅女》及小說《風暴來的那一天》等作品，曾獲得青年文學獎散文高級組冠軍及小說高級組亞軍，文學造詣及創意不容忽視。
吳沚默受訪時大讚《典籍》製作手法新穎有趣，香港觀眾睇必有得著：「就算唔知典籍具體發生乜事，都可以了解吓入面嘅名句同中心思想，套用番喺依家都有機會受用。」吳沚默笑言吸收嘅資訊多咗，同人哋嘅話題亦自然多啲，咁分分鐘對溝仔、溝女有幫助，教仔嗰陣可能多啲哲學同古人智慧可以分享，佢又爆平時講開波經嘅鍾仔，私下經常「之乎者也」十分搞笑。
文化節目《典籍裡的中國》逢周六晚 9 點半翡翠台播映