坤哥99支玫瑰甜冧嬌妻 坤嫂28歲生日首與老公過

2022年喺日本突發同 吳業坤 註冊結婚成為夫婦，之後仲嫁雞隨雞放低日本主持身份來港嘅 浜口愛子 星期五度過29歲生日，近來正式現身唔同活動同大家見面，又非常努力以廣東話接受傳媒訪問嘅坤嫂，月初返完日本探望家人，生日就留返同老公一齊度過喇。

不時會探索香港大街小巷嘅呢對年輕夫妻，原來今次仲係佢哋自相識以來首次共度生日，難怪坤哥要隆重其事一早預備99朵白玫瑰送俾太太喇。喺《香港人在北京》扮演 石磊 嘅坤哥表現靦腆，對住鍾意嘅人都唔太敢正式表白，只以行動支持，不過現實嘅坤哥就化身愛妻號，仲以寓意天長地久永不分離，加上香水色玫瑰代表嘅永不忘記對方獻俾嬌妻，真係浪漫到暈呀。