由黎耀祥主持嘅《請客必食18道菜》，今個星期將會同大家介紹五款星級請客必食名菜，分別有由18頭鮑魚炮製嘅「吉品鮑魚扣遼參」、滋補養顏嘅「魚子醬脆皮花膠乾貝青汁」、因已故鄧肇堅爵士而得名嘅「爵士湯」、口感嫩滑嘅「藤椒蒸紅瓜子斑」，同內有乾坤嘅「私 房乾鮑富貴雞」。
而有「陳皮達人」美譽嘅保哥黃亞保，將會教煮家庭宴客菜「陳皮雞」，當保哥講到選用沒有骨頭嘅雞扒，可以令一家大細更安心享用時，祥仔忽然站：「嘩！幾細心！照顧周到，唔怪得你係新一代師奶殺手！」場面搞笑。
除咗品嚐名菜佳餚，祥仔仲同大家掃街介紹地道小食，除咗到「平民美食天堂」西灣河太安樓歎招牌牛雜，又前往鬧巿品嚐港式滷味、生滾靚粥，當然唔少得最強民間美食港式燒賣。祥仔一邊落手落腳幫忙包燒賣、一邊聽住小食店老闆朱先生訴說充斥親情與人情味嘅「守護燒賣」故事。朱老闆憶說：「爸爸離開咗(過身)後，我有段時間好失落，曾經諗過唔做呢間鋪頭。不過有日有位街坊嚟食燒賣，佢話呢粒燒賣有好多佢同已故太太嘅回憶！」就係呢句說話令朱老闆搵到繼續經營店鋪嘅理由，守護燒賣嘅同時，亦希望守護呢款地道美食曾經帶畀街坊嘅美好回憶。
除咗聽別人嘅故事，祥仔亦分享咗自己嘅故事，喺粥品店時分享咗兒時與父母嘅親子樂，仲解釋自己鍾意食粥係因為受媽媽影響：「幾歲嗰時如果屋企得我同媽咪，佢都會帶我食粥；有時星期日煲一大鍋粥，老竇買啲油炸鬼返嚟，一家人都會食粥。粥係對我嚟講係幾有回憶、同幾鍾意嘅美食！」
《請客必食18道菜》於23、24號 播出第4、5 集
