TVB熱播台慶劇《香港人在北京》噚晚 （24號）播出呢集劇情講蘇菲（蔡潔飾）陪同港仁（陳展鵬飾）去珠海傾生意，後來蘇菲飲醉酒獲港仁送回酒店，對港仁餘情未了嘅蘇菲借着酒意告白： 「點解你當年要失約，如果你有嚟到嘅話，我哋世界就唔同晒…」蘇菲講完情不 自禁吻向港仁，身為愛妻號嘅港仁最終把持得住，用手指放喺嘴前拒絕蘇菲獻吻！
蔡潔坦言拍床上獻吻戲冇尷尬：「大家都係專業演員，嗰場主要係講個氣氛，大家都係盡力去演出嗰場戲嘅氛圍，展鵬厲害之處係唔會令你緊張，我哋喺輕鬆嘅氛圍下完成拍攝。」蔡潔與展鵬合作曾擔心招架不住，皆因蘇菲呢個角色要Lead住嚟行，仲要氣場咁勁，蔡潔讚展鵬喺劇中演到港仁嘅可愛同天真一面，一出場就會Catch到大家嘅眼球，又唔會太鋒芒畢露，蔡潔終於領教到視帝嘅功力。」蔡潔噚晚大露背晚裝晒白滑玉背非常搶Fo，蔡潔笑言嗰件晚裝上半身只係得一塊布，但出嚟效果好靚！
蔡潔大方分享美白及健美心得：「我以前好鍾意飲牛奶，可能同飲得多牛奶有關係，同埋我幾喜歡練背肌，但唔係練大隻嗰種，練背肌除咗可以保護脊椎令到女士線條更凸出，仲可以令到塊面更Firm。」 另邊廂Helen（吳若希飾）誤打誤撞，為姑仔寶怡（戴祖儀飾）擔任幕後和音，從而被張帥（梁漢文飾）發掘歌唱天賦，邀請Helen參加踢館賽，造就兩姑嫂同台，今晚（25號）播出呢集講吳若希同戴祖儀將合體獻聲，以型格「黑雙煞」造型獻唱《Crying》，兩人一唱一和非常合拍，張帥最終選Helen做學員，惹來寶怡醋意爆發，今晚吳若希與梁漢文將有一場拍攝宣傳照場口，惟要近距離接觸嘅兩人全程怕怕醜醜，最終更仆倒收場。
講到劇中有唔少唱歌場口，吳若希受訪時透露：「喺未拍呢套劇之前，我係未試過 企喺一個咁大嘅舞台演出，所以有好多唱歌場口真係有一種開騷嘅感覺。而開完呢套劇之後，我先夠膽開屬於自己嘅個人演唱會，呢套劇喺唱歌事業方面真係幫咗我。」提到與前輩梁漢文合作，Jinny大讚對方親和力好強：「同佢做對手戲唔會好驚，同埋佢會令到我好想同佢傾偈，合作得好開心，好似多咗個哥哥咁！」
台慶劇《香港人在北京》逢周一至五晚9點30分翡翠台播映