為慶祝Gigi炎明熹終於達成夢想，舉行首個個人演唱會，佢一班忠實粉絲「Gi炎粉」早前為偶像舉行電車派對，兩架唔同主題嘅應援電車，一架印有Gigi全新作品《Only For Me》MV靚相嘅主題電車，而另一架係根據MV內出現過嘅場景而重新佈置嘅派對電車，可見Gi炎粉非常有心思。
Gigi喜獲fans club一手一腳安排活動，佢先坐派對電車出發，之後轉坐《Only For Me》電車回程，今次係佢第一次坐以自己做主題嘅電車，Gigi心情好興奮，不過今次參與嘅fans人數好有限，希望遲啲搞多啲大型聚會，有機會同大家更多互動，Gigi認為除咗搞音樂會，之前有舉行過BBQ，下次可以搞打邊爐或一大班人一齊行山，感覺好唔錯又有氣勢。
派對當日，兩架應援電車載著Gigi與粉絲由西環屈地街電車廠出發，到達銅鑼灣後再折返西港城，沿途不斷有粉絲向站喺電車上嘅Gigi揮手，期間更有路過嘅外國旅客加入，場面十分熱鬧，Gigi更與粉絲喺車上一齊舉行大食會、玩遊戲，仲自爆拍《Only For Me》MV瘀事。
由於MV拍攝地方比較荒蕪，拍攝團隊安排一架附設洗手間嘅化妝車畀Gigi使用，用嚟補妝同換衫，當時佢正準備落車，因為擔心甩裙，最後一個不留神整個人仆咗喺地上，Gigi忍唔住取笑自己太遴迍。
粉絲細心佈置派對車喺車廂內還原多個《Only For Me》MV場景，包括喺MV開首出現過嘅麥皮蟲，原來Gigi對麥皮蟲情有獨鍾，覺得牠們「肥嘟嘟、好得意」，粉絲們更準備咗一大盒麥皮蟲送畀偶像，Gigi急不及待把麥皮蟲放喺手上把玩，仲好奇地問點樣飼養同餵食。
提到演唱會因颱風關係只開咗一場，事後Gigi曾喺社交網站分享感受，坦言冇感到失望，反而可以讓自己有更充裕時間，為補場做更好的準備：「暫時補場未知幾時，因為我都要考試，好難分心去準備演唱會嘅事情，甚至日後嘅公開演出，次數都有機會減少，所以補場嘅日子，應該要去到明年。」
至於喺個唱長達十多分鐘跳唱演出，外界一致讚好，Gigi笑言之後將挑戰更多跳唱歌曲：「我好想挑戰跳唱，今次嘅演出，對自己嚟講係一個突破，其實跳舞真係好難，唱歌同樣難，所以要好多謝樂隊同跳舞嘅老師們，俾咗好多力量我，希望日後可以拍啲跳舞片畀大家睇。」
臨近年尾，各大音樂頒獎禮蓄勢待發，憑《Little Magic》奪得四台冠軍歌，新作《Only For Me》網上點擊突破百萬，總算交出亮麗樂壇成績表，Gigi對拎獎抱平常心：「我對獎項冇乜期待，順期自然係一個最好嘅結果，大家唔使太擔心，自己都唔好咁在意，雖然每一個獎項對我嚟講都係一個好好嘅鼓勵，但只要我做好自己，大家繼續支持我，對我嚟講已經係一個好好嘅推動。」