J2（82 台）向來擅長炮製特色旅遊及煮食節目，逢周一至五晚10點半播出全新節目《Christian In Paris》，結合J2 兩大王牌要素旅遊及煮食。由綽號「廚壇魔術師」楊尚友（Christian）主持，帶同一家4口走訪巴黎，由美食出發，集旅遊、享樂親子於一身，以「食盡最正美食，睇盡巴黎最靚美景」為目標。
每集Christian將嚐過嘅法式美食，喺自家廚房重現，讓人人可以變廚神。 今晚（27日）Christian 同太太Judith掉低一對仔女，為咗尋訪美劇《Emily in Paris》足跡，潮聖劇中Emily到訪過嘅餐廳。Judith作為不折不扣嘅《Emily》迷，佢全力以赴打卡。第一站係劇中曝光率最高，Emily同靚仔廚師Gabriel撻着嘅地方Terra Nera餐廳。劇中嘅法國餐廳，現實中是間意大利餐廳。 Judith強烈要求到訪係因為劇中Gabriel實在好靚仔。兩公婆分別點咗意大利雲吞及蜆肉扁意粉。
下一景點係喺隔籬舖，只有十步之遙嘅Boulangerie Moderne麵包店。劇中Emily經常光顧嘅麵包店，經常被老闆娘糾正法語發音。該店亦並非浪得虛 名，今年贏得全巴黎最佳牛角包亞軍，Christian被該店florentin甜品吸引。 Christian滿足完太太打卡願望，跟手佢到聖米歇爾大道感受文青氣息，到訪一間莎士比亞書店兼圖書館。店名跟莎翁本尊其實無關連，不過接連成為電影《情迷午夜巴黎》、 《日落巴黎》嘅取景場地。
法國甜品自然係每集推介，今次介紹一間被喻為法國最好食餅店，由著名糕點師Carl Marletti打理。主打檸檬撻先後贏得2010巴黎最佳檸檬撻金獎及2020康城最佳甜品銀獎。Christian特別欣賞千層酥，口感細膩而豐富，讚不絕口。 《Emily in Paris》為一部美劇，目前已拍到第三季，故事講述女主角Emily由美國來到巴黎工作。在不諳法語下以美國人視野看巴黎，劇集中Emily到過嘅餐廳，已成為戲迷潮聖地。
《Christian In Paris》逢周一至五晚十點半 J2（82 台）播映