陳奕迅（Eason）病後重啟澳門演唱會，噚晚開始一連四日喺澳門舉行FEAR AND DREAMS世界巡迴演唱會，當大家以為佢病未完全痊癒會影響水準，Eason卻發揮極限潛能，觀眾嘆為觀止，掌聲雷動， 狂叫「好正呀Eason」。
噚晚演唱會第一次從第二Part開始，多首歌曲現場觀眾跟住和唱，到《今日》一曲更係全場亮起手機燈並大大聲合唱，讓Eason感動得落淚，要不停用手抹淚，Eason冷靜情緒再繼續演出。為咗答謝觀眾熱情支持，Eason喺Talk 位表示因大家熱情支持，呢晚佢多送一首歌畀大家，令觀眾欣喜若狂。
Eason喺Encore環節並冇食言，向觀眾宣佈最新專輯《CHIN UP!》將喺10月27日午夜正式推出，所以佢為大家送上小禮物，全球首唱當時仲未推出嘅新歌《社交恐懼癌》，「你們是全球第一人聽到這首歌的LIVE，多謝你們，希望你們喜歡。我的新碟有八首歌，再過一會兒你們就可以在網上聽到，有機會聽原裝正版這首歌可能會更好聽，因為唱LIVE一定會有少瑕疵....」觀眾歡呼拍掌以示讚許，接著又跟全場大合唱唱咗《單車》、《十年》及《明年今日》。
演出過後， Eason坦言演出前係有壓力，擔心自己感染嘅鼻病毒未完全康復而影響水準，明知觀眾為自己改期，周車勞頓再到澳門，更加有不可失準「唔衰得」嘅心態，「整晚我的鼻水一直不停流，因為病毒會弄穿鼻膜，一擤鼻涕就如瀑布傾瀉，所以要忍，不能擤，要慢慢用紙巾吸出來，每次回去後台換衣服時都很尷尬，要工作人員幫我慢慢吸鼻水出來。唱新歌《社交恐懼癌》時我控制不了，鼻水直流面上，不知大家見不見到。哈哈！」 Eason又指呢晚仿效林憶蓮唱法用陰力嚟唱，原來當人遇到好大障礙，就會自動激發潛能，總有辦法出來，從來冇用過某部份功能唱歌，發現用陰力唱原來可以令歌曲更感動，唱到自己都感動到自己，相信觀眾會有更大感覺。
Eason不只感動落淚，唔少歌迷陪佢流淚，Eason透露：「我散光見不到，自己是因病便比較脆弱，唱到今日事情如不順，今日問題仍不盡....就更是觸動神經，所以平日很少會在舞台上落淚，也忍不到淚如雨下。」Eason大讚呢晚觀眾給予支持及欣賞，讓佢感受台上台下融為一體嘅感覺，一個演出台上台下能融合就係一個最好嘅表演，Eason認為喊唔係壞事，喊係一種很好嘅抒發方法，一直強忍著反而會忍到病。
Eason首唱新歌《社交恐懼癌》，一升台已整個人入晒戲，像有社恐一樣，讓人毛骨悚然，Eason笑道：「我完全投入了首歌內，很入戲，哈哈！」而網上歌迷即時評論，讚嘆世上終於有一首代表到MBTI中的「I」型人嘅主題曲，Eason表示歌迷真係好厲害：「這首歌當然是『I』型人主題曲，因為寫歌的林家謙明顯是『I』，而寫詞的李榮浩也是『I』，而主唱的他是『E』型，因為年長了，已經開始由『E』偏了一些去『I』。」Eason認為呢首歌最好嘅形容詞就係「梁朝偉去睇My Little Airport」，最後佢希望鼓勵「I」型人踏出恐懼，不必拘泥於社會上嘅標籤，人生從來只是需要嘅係自在。