TVB台慶劇《羅密歐與祝英台》（以下簡稱《羅祝》）前晚嗰集講到祝英喬（陳茵媺飾）得力助手馬文才得悉英喬真身，其實係自己掛念咗足足廿年嘅未婚妻祝英台（陳茵媺分飾）後大感憤慨，不過噚晚（26號） 當佢得悉「聰明藥」事件對祝家不利，仍顧全大局致電英台，卻喺會合英台前遭設計圍攻殺害，斷氣前用盡最後一口喺英台面前宣洩不甘心，「對住你咁多年都認唔到你係英台，我真失敗」，並約定英台「我今世無緣，希望下世…」 深情對白加上徐榮入肉演出，連頸上的青筋都隨住激昂嘅情緒暴現， 名副其實渾身是戲。
馬文才以為英台已死並默默為女方守候足足廿年，一直獲得不少網民同情，更被封 「悲情兵仔」， 對於文才噚晚難逃一死，網民大表意外及不捨，另一邊飾演Dave嘅黎學勤亦獲得不少支持，對於佢被茱麗葉「耍」咗咁耐仍對女方癡心一片大表痛心。
英喬與萬件通/梁山伯（陳豪飾）調查文才死亡真相期間，與兇手喺停車場火併， 雙陳不但夫妻檔上演「行走中的神槍手」，邊跑邊向目標開槍， 更不約而同飛躍上車大顯驚人跳躍力，雙陳劇中愛情線越睇越吸引，並指最大功臣係飾演社工「謝姑娘」嘅黃碧蓮。噚晚謝姑娘向萬件通送上心心情侶水杯、激到英喬打翻醋罈一幕非常爆笑。謝姑娘為咗表達愛意，先後六連環出招擄獲男神，包括送情侶水杯、送外賣、強調單身、悉心打扮、無限冧樣及主動獻吻，其中獻吻一幕更嚇到萬件通「紅都面晒」， 網民笑指碧蓮係「進擊的謝姑娘」。
碧蓮笑指稱跟陳豪Kiss場口有先向 Aimee「自首」：「咁我同Aimee都係加拿大女仔，所以拍呢場戲之前我都同佢講笑 『唔好意思，我要錫你老公』，佢笑講『It’s Ok，Go Ahead』，我聽完就冇咁緊張。」碧蓮又指拍攝當日Aimee亦有在場，但二人未有碰面，拍攝時台前幕後表現專業，劇情講碧蓮見到陳豪嘴度有醬汁， 原本想幫佢抹，哄埋去嗰陣被誤會想Kiss，碧蓮又分享搞笑花絮指導演話「唔Cut唔好停」，佢只好掂住咗陳豪鬚根，感覺好拮，同時佢心諗點解仲未Cut！
台慶劇《羅密歐與祝英台》逢周一至五晚 8 點半翡翠台播映