J2節目《浪漫台灣48小時》以約會旅遊實境作賣點，施焯日（Arthur）及蔡景行（行仔）代表香港男生，喺台灣體驗與當地女生約會。共20集嘅節目中有8位唔同職業嘅台灣女孩子登場，包括職業啦啦隊、健身教練、重機女神網紅、極有個性嘅檳榔西施、登山網紅、 Cosplayer、身材火辣嘅普渡女神及直播成人台女優。
聽晚（8號）Arthur迎接「挑戰」，跟登山網紅「肉食系」嘅藍鯨約會。人如其名藍鯨有壯健體魄，喜歡赤身露體行山。飯量驚人，午飯時個人獨取兩份餐係Arthur食量嘅一倍。藍鯨作為「肉食系」女生，行事非常直接。佢哋行野外用品店時，藍鯨自爆喜歡穿比堅尼行山，又問 Arthur會唔會有六塊腹肌，已伸手想拉起對方T恤，嚇到Arthur往後縮拒絕。
本周Arthur同登山網紅「肉食系」藍鯨將到訪平溪煤礦博物館，今趟「情場浪子」Arthur第二趟受到考驗。交談中提到當年礦工入煤礦前，要接受健康檢查。藍鯨聽後二話不說便要替 Arthur作體檢，嚇到Arthur再次出手制止。
藍鯨事後直言唔介意互動，讓Arthur做檢查，藍鯨興奮咁話：「如果是我喜歡的對象，對我有肢體接觸的話，其實是蠻開心的。『人醜性騷擾，人帥真好』。」Arthur雖然兩次被情挑，但接受訪問時自言對藍鯨有好感，Arthur認鍾意熱情嘅女仔，身體檢查亂摸係有啲嚇親，不過佢接受得到。
至於行仔今晚（7號）約會對象係檳榔西施芬尼，芬尼外型纖瘦，從紋身到打扮都表明係辣妹。佢行為斯文有禮，完全係行仔喜歡類型。行仔約會經驗值比起前兩次已增強唔少，今晚首次約會已安排行山路，製造拖手機會。行仔事後充滿自信︰「同芬尼溝通互動良好，係非常之滿意。可能係有咗經驗，所以即刻強咗起嚟。」佢哋本周由新竹愛情火車站（合興車站），甚有香港feel嘅東門市場都不停互動合照，感覺如熱戀中嘅小情侶。不過行仔今晚卻做錯一件事，令佢同芬尼未能更進一步而耿耿於懷。
《浪漫台灣48小時》逢周一至五晚8點半 J2（82台）播映