泰國旅遊達人胡慧冲嘅「冬蔭家族」有新成員加入，佢就係同林依晨有啲似樣嘅冬蔭表姐Yan，佢將會同胡慧冲、叉燒姐」鄺玲玲同埋一眾冬蔭家族為大家主持最新一輯《冲遊泰國》。
新成員冬蔭表妹原名Naphatchakorn Jitrak，係純正泰國正妹，本身喺男朋友旗下嘅餐廳擔任市場推廣，最近先由布吉搬到曼谷，就畀胡慧冲拉攏成為「冬蔭家族」成員。
8號晚一集胡慧冲就同冬蔭表妹一齊出動，到訪全球唯一一間嘅小王子主題咖啡廳L'Envol Art Space Bar & The Little Prince Café。呢間小王子fans必到嘅朝聖地，有別位於韓國嘅小王子博物館，店內可以試到多款homemade法式甜品同咖啡，同時又可以欣賞到店內小王子嘅場景同人物陳設，以及小王子作者嘅手稿。
至於觀眾們心心念念嘅「叉燒姐」鄺玲玲，呢集就同胡慧冲一齊推介一間連續6年獲米芝蓮推介嘅平民美食店兄旺魚粥。雖然叫粥店，但入面各式海鮮應有盡有，鄺玲玲先品嚐店內必食、100泰銖（約22港元）一隻嘅泰國生蠔，鄺玲玲食完猛叫「真係好甜」。之後又挑戰泰式生醃蟹，鄺玲玲笑言移居泰國10年，自己已經可以應付醃製海鮮，佢品嚐完畀出食評：「味道比較『泰國』非常之濃烈，好地道。」
而10號晚播出一集，冬蔭表妹同鄺玲玲都分別再登場，前者去到曼谷舊區一間有125年歷史老宅改建成嘅特式酒店Baan Tuk Din Hotel。酒店設有Jazz Bar同餐廳，酒店只有18間房，每間房設計都唔同，以古舊典雅為主。百無禁忌嘅冬蔭表妹居然不聽胡慧冲勸告，半夜三間去酒店大堂selfie，在大堂的射燈效果下，將靚靚冬蔭表妹拍成鬼樣，非常搞笑。
至於鄺玲玲就到訪Cat Smile Café，店內除咗有數十款唔同種類嘅貓咪同你共處一室外，最吸引嘅地方就係呢間Café營業到凌晨，啱晒夜貓又愛貓嘅人仕。本身對寵物毛敏感嘅鄺玲玲，為咗同貓咪玩，拍攝前預先食定抗敏藥，佢話︰「但凡有毛嘅小動物都好鍾意，可惜有鼻敏感，一接觸到貓狗毛，就會不停打乞嚏。」
《冲遊泰國》逢星期一至五 22:30 J2 82台
