跨粵劇與演藝界攜手演出劇作家曹禺經典名著家傳戶曉話劇《雷雨》，連日嚟多位圈中人及名人捧場，繼首演場有陳慧嫻、張衛健、蔡一傑及張叔平等出席，第二場有周慧敏、黎瑞恩及邵美琪結伴欣賞，睇足全場更去後台打氣。
周慧敏與黎瑞恩（小恩子）本身與時裝設計師陳華國及陳希寶（George）稔熟，佢哋演唱會舞台服裝均交由陳華國設計，而陳希寶係服裝設計師，對方首次跨界演舞台劇當然要嚟支持，周慧敏過往曾睇過陳培甡兩齣粵劇，與今次以時裝演周萍完全兩個感覺，配上陳華國嘅服裝，具有豪門大少風範好入戲，各演員服裝造型顯見陳華國心思，佢大讚黎燕珊著旗袍型態好靚，被問有冇心郁郁想演舞台劇，周慧敏坦言一直以嚟都有人邀請，不過未遇到一個好角色又適合自己演，所以佢唔想夾硬演，隨緣不強求。
小恩子曾演過舞台劇，了解演舞台劇絕對唔易，更欣賞今次台前幕後班底嘅合作，將一台戲演得好精彩，小恩子相信再濃縮一啲就更緊湊，邵美琪熱愛戲劇亦有演舞台劇經驗，喺後台讚黎燕珊為演好角色減10幾磅好專業，因為著旗袍形態確與別不同。
黎燕珊最開心今次喺後台重遇大師級造型師張叔平及星級髮型師Herman Law：「當年我拍電影《喜寶》，阿叔（張叔平）係美指加上Herman設計髮型，阿叔當時取笑我，你睇吓自己個肚腩？自始之後，我就唔畀自己有肚腩，所以今次後台重遇，就同阿叔重提呢件事，大師一句話影響咗我咁耐呀！」珊姐嘅兒子喺外地工作只能睇舞台劇演出照片，阿仔大讚一定掂，而珊姐女兒就會親自捧場。
今次出品人兼導演及男主角為粵劇小生陳培甡，主要演員尚有黎燕珊、南鳳、鄧有銀、陳鴻進、黎耀威、呂洪廣及陳希寶等，同時幕後班底強勁，由資深話劇演員羅冠蘭義務指導，更由大師級服裝設計師陳華國擔任服裝設計，舞台設計為國家級佛山粵劇院，梁煒康擔任舞台燈光設計等。