Twins紅館騷門票兩小時售罄 主辦加開2場公售開騷撞孖妹生日

相隔9年後宣佈將再度踏足紅館舞台展開演唱會嘅Twins，6場門票15號接受優先訂購即被瘋搶爆滿。主辨單位隨即宣佈加開兩場，門票22號起於城市電腦售票網公開發售。今晨門票兩小時內已經售罄，而Twins今次破紀錄開足8場演出，唔止Fans興奮，阿Sa(蔡卓妍) 阿嬌(鐘欣潼)亦一樣開心。

阿sa指：「以組合來講，入行22年仲可以開演唱會，企喺個台度同大家慶祝，真係好難得！所以呢個演唱會對我哋嚟講係好有意義！知道咁多人仲繼續支持我哋，又感動又開心！希望到時大家可以有一個好好玩嘅晚上。」

巧合嘅係，門票公開發售當日係阿Sa生日，而演唱會頭場演出就輪到阿嬌生日，不過佢哋就指並非特別選擇呢兩日喇：「真係咁啱，紅館期邊有得揀話想邊日，第一次公司同我哋講個開騷日期，我地都覺得好奇妙，所以公司就話，不如係我生日公開發售啦！咁兩個生日都可以雙喜臨門啦！ 」而

阿嬌則話：「揀得中呢兩個日子售票同開show都係第一次，覺得好開心好受重視，哈哈。加場雖然開心，但都開始有啲壓力㗎，希望到時可以做到最好比大家！」

阿Sa仲指今年生日願望係做好演唱會。仲已經準備好開始排舞練歌喇。而兩人早前為演唱會籌備開會，阿嬌因身在外地工作，只能以用電話視像參與，齊齊傾足4小時，整個過程仲充滿歡樂笑聲，唔止齊齊揀歌，阿Sa仲即時排舞俾阿嬌睇。