港產電影《白日之下》自上映後票房氣勢如虹，電影上映第14日，成功成為本周三單日票房冠軍，截至15號累積票房已迫近1000萬！
戲中飾演偵查小組記者嘅梁仲恆阿炳，由開畫第一日就已經參與謝票，見證愈嚟愈多人入場支持電影，阿炳表示相當興奮，同時亦透露當年睇到戲中改編嘅案件時相當震撼，阿炳話：「2015年的時候，看到有關院舍沖涼影片時候，覺得很震驚。其實我自己當年也因為同一單新聞創作了一個劇本。想不到事隔多年後，我又會再碰上這個議題。」
而喺戲中扮演惡毒院舍看護嘅寶珮如Baby，唔少觀眾都讚佢演得入木三分，仲話佢完全可以入圍爭獎。對於觀眾對自己嘅讚賞，Baby就特登拍片感謝大家：「可以同到咁多高水準、高水平嘅演員一齊合作，兼得到大家認同我好開心，真係好開心，我並無諗過自己嘅成就或有咩任何提名，我會繼續努力學習，希望喺未來嘅日子，演多啲不同角色。」
而特別演出嘅修哥胡楓，對於票房逆轉報捷同樣感到興奮：「《白日之下》當初票房並唔理想，但點解愈映愈旺場，主因因為電影好，觀眾有共鳴，一傳十，十傳百，故此而家愈收愈多，認真恭喜，證明電影好會有觀眾欣賞，我對呢套戲嘅評係咩，就係Very Good喇﹗」修哥又指戲中所有演員、甚至係臨時演員都好識做戲，同時佢又讚首次合作嘅余香凝演技爐火純青，修哥話：「於姜大衛演技一流，大家都公認，而余香凝我第一次同佢合作，我覺得佢演得好爐火純青，令我非常欣賞，我同佢哋合作我感覺到非常非常愉快。」
戲中演修哥女兒嘅譚玉瑛，對於票房成績直言係喜出望外：「冇諗過咁短嘅一場戲，會得到咁多正面嘅回應、鼓勵，票房證明咗香港人係好關心香港事，那麼香港就會變得更可愛喔﹗」