王鎮泉 Jeoffrey 每星期為你提供最熱辣電影資訊，中外猛片專訪花絮上映時間全部集齊。「電影泉攻略」每周四買定爆谷陪你睇新戲。
繼超級英雄電影之後，而家越嚟越多人鍾意睇人物傳記，好似年度風雲人物之一嘅Elon Musk，佢本自傳就大受歡迎，引嚟好多電影公司爭奪版權，最後由A24買到，將會由曾經執導過《黑天鵝》、《鯨》嘅Darren Aronofsky操刀，就連Elon Musk都公開大讚呢個導演人選。另外有消息指Britney Spears本自傳都相當暢銷，成個荷里活都爭住想買個版權，有指 Margot Robbie、Brad Pitt同Reese Witherspoon等都係投標嘅競爭對手，仲有人出價8位數美金。
本周嘅新片速遞有榮獲第60屆台灣金馬獎五項大獎提名嘅《年少日記》，講迹一封冇署名嘅遺書，令中學老師鄭Sir諗起充滿暴力與遺憾嘅童年往事。《飢餓遊戲前傳 鳴鳥與靈蛇之歌》講述即將迎來第十屆飢餓遊戲 ，當中唔只被抽中嘅貢品要以孤注一擲贏比賽，連出身都城世家嘅學生都要擔任導師，同佢嘅貢品合作。《血腥假期》原本一家團聚嘅感恩節，卻引來頭戴詭異面具嘅殺人狂魔，喺鎮內以超血腥手段四處殺戮。
嚟緊有好多新戲排住上映，特別係喺荷里活嘅編劇同演員工會嘅罷工相繼結束後，加菲貓亦會推出《加菲貓大電影》，喺最新嘅預告片入面，BB時期嘅加菲貓係點俘虜主人阿北個心。電影搵嚟Chris Pratt同Samuel L. Jackson配音！
本周票房戰況截至11月15號中午，第3位係《我的天堂城市》、第2位係《白日之下》、第1位就係《MARVEL隊長2》。
