張慧儀喺劇集《叠影狙擊》飾演嘅Mag姐角色喺16號晚播出號一集入面登場，雖然登場唔夠兩分鐘，但係佢霸氣嘅演出令唔少網民大讚，期待佢喺之後嘅劇情入面同周秀娜「過招」。
張慧儀個角色好霸氣。
呢集另一個亮點，就係甚少拍劇嘅鄭融驚喜登場！佢喺劇中連番藐爆同奚落娜姐嘅演出，亦被網民大讚表情到位。對於喺劇中數落娜姐嘅一場戲，鄭融受訪時表示：「第一日拍攝就要同娜姐做對佢充滿仇恨、情緒複雜嘅內心戲，確係有啲難度，所以需要用時間醞釀情緒，感受被人大力出賣嗰種痛苦先開始拍攝，都算係大挑戰。」
53歲嘅張慧儀保養得宜。
鄭融表示如果現實生活中遇到呢種潑辣女人時，佢會選擇放下，因為佢話自己唔太鍾意同人鬥，覺得無論輸贏，其實某程度上都係兩敗俱傷，對大家冇好處：「放過自己同對方會係我嘅解決方法。」講到17號晚播出嘅一集，將會被娜姐以利器要脅，鄭融就笑說：「嗰場每個動作嘅走位都要非常準確，好認真排咗好多次先可以配合到機位拍攝，確實非常刺激。」
鄭融嘅表情相當到位。
至於喺劇中再挑戰喊戲嘅娜姐，直言呢場戲拍得相當痛苦：「當時係1月份仲好凍，坐喺室外醞釀情緒，一路 keep 住震，演嗰場戲好痛苦。」對於喺劇中一人分析兩角、兩姊妹同場嘅戲份，娜姐都話演起嚟有難度：「我先着家姐戲服，拍完再換妹妹嘅戲服再拍，由於現場set好晒機位，位置要完全一模一樣，製作組有搵替身坐我隔籬對好位置，但自己要預先諗好情緒至 roll 機，唔想NG累到人。」
呢幕即將播出呀！
另外，無綫官網昨晚亦發起票選，邀請網民留言分享對張慧儀最有印象角色，出爐答案包括 《真情》嘅彩瑤、《西遊記》嘅蜘蛛精詩詩、《西遊記(貳)》嘅大蟒精同埋《阿SIR早晨》嘅唐寶珊等，令民網嘅集體回憶返晒嚟。

《叠影狙擊》逢星期一至五 21:30 翡翠台

方力申飾演馬家明。

郭政鴻喺《叠影狙擊》入面飾演囂張又傲慢嘅大反派，為達目的不擇手段，由頭奸到尾。佢自己都話喺劇中係奸到盡：「上次我喺劇集《家族榮耀》演好哥哥，今次就係最奸嘅反派，兩者好大反差，亦係我其中一個最奸嘅角色！」郭政鴻指自己個角色係遇神殺神、遇佛殺佛，心目中只有金錢同權力，所以佢話自己要演得再辣啲，好似一個霸道嘅梟雄咁。
郭政鴻喺劇中奸到出汁。
雖然出年將會「登六」，但係唔少網民都讚郭政鴻保養得宜、身形超弗勁屈機，對此佢就分享獨門減齡秘技：「好多觀眾都問我點保養，自己戒晒宵夜，油膩及甜嘢都少食，當然要配合運動；同時我好貪靚，成日去做facial，如果冇時間都會喺屋企以家用美容儀去緊緻皮膚，所以仲keep得到。」
 
喺《叠影》入面有唔少搶鏡嘅配角，好似忠奸難辨嘅「Tina」文頌嫻、天才罪犯「教授」張松枝、潑辣寸嘴嘅「Brittany」鄭融等，而飾演夜店GOLF CLUB 19經理龍少嘅陳少邦，佢喺劇中一個「謎之微笑」更獲內地網友封為「年度代表作表情包」，話好難得有咁可愛嘅奸角。
陳少邦「謎之微笑」成為新一代表情包。
陳少邦喺劇中經常成為娜姐出氣袋，場面亦相當有喜感，佢喺訪問時笑言冇諗過奸角都要搞笑：「《叠影》好多劇情都好認真，加咗龍少被娜姐打同撞板嘅表情落去，可以等觀眾紓緩吓情緒。難得今次可以試吓搞笑擔當都係好事，之後播嘅劇都係演番反派，希望可以多演啲搞笑角色。」講到佢喺劇中嘅「謎之微笑」獲讚，少邦坦言自己睇playback時都覺得搞笑，仲話希望可以成為有代表性嘅表情包呀！
周秀娜以為陳少邦係武師，所以打起嚟完全唔留手！
首度同娜姐合作嘅陳少邦，大爆拍攝時趣事：「第一日開工就拍畀娜姐拗斷手指同畀佢打，其實娜姐唔知我係邊個，武指當時介紹我係龍虎武師，娜姐就好放心出力咁打我同拗我手指，所以都幾痛吓。之後我解釋番自己其實係演員嘅時候，娜姐仲請我飲咗杯咖啡添！」對於入行24年，但娜姐竟「不知道陳少邦是誰」，陳少邦就豁達咁話因為大家未合作過，所以對方唔知都唔出奇，佢笑言：「佢知道我係演員後仲係一頭霧水咁，好好笑！」

陳少邦1997年曾參加校花校草選舉，同屆校草冠軍是袁偉豪，兩年後少邦加入無綫第13期藝員訓練班，與林峯、楊茜堯等為同期藝訓班同學，入行至今在無綫曾拍過逾50套劇集。今年初少邦在《法言人》演反派闊少甚為搶fo贏盡好評，今次在《叠影》飾演「搞笑型奸角」，有望殺出新戲路。

《叠影狙擊》逢星期一至五 21:30 翡翠台