下個月就係聖誕節，街上開始充滿節日色彩，莫文蔚呢日應邀擔任商場聖誕亮燈儀式嘉賓，獲聖誕老人送上禮物，令Karen一臉驚喜。
Karen今年會過一個充實嘅節日，佢透露聖誕節會返到老公Johannes 嘅家鄉德國，與家人共度傳統聖誕節，仲爆奶奶會下廚煮聖誕大餐同大量曲奇餅，令Karen可以大飽口福，聽見都相當羨慕。而聖誕過後Karen則會趕返香港迎接倒數過新年，日子過得相當充實。
周星馳正為一部球類題材新戲招募女主角，Karen曾經表示有意挑戰魔鬼教練角色，而身材fit爆嘅佢早前就化身貓女爬長城，Karen話幾年前已經有呢個概念，主要將super hero人物拯救野生動物同環保訊息發揚光大。
Karen早前舉辦展覽慶祝入行30周年，粉絲們反應熱烈，令Karen有意添食，仲話展覽好快會再同粉絲見面，至於咩地方佢就大賣關子，同時Karen亦忙於為新歌宣傳。
