台慶劇《叠影狙擊》有唔少藝人驚喜出現參與演出，好似樂隊 Nowhere Boys 嘅主音Van陳維諾，日前一集就放下Band友形象，飾演一名掛羊頭賣狗肉嘅獸醫，協助販賣人體器官集團喺診所內活摘人類器官。
拍攝當日佢正準備活摘 朱鑑然 嘅腎臟，好在佢嘅好友 周秀娜 及時出現阻止，Van話：「我係一個販賣人體器官嘅無良獸醫，原本想劏朱鑑然，點知有報應，俾朱鑑然劏番轉頭。」
雖然Van呢次要被娜姐拳打腳踢兼叉頸，又會被五花大綁喺手術床上，不過Van就認為呢日拍攝，每位男士睇完都會既羨慕又妒忌，佢話：「頭先俾娜姐壁咚足足一個鐘，不斷將我個頭推埋牆，好近距離，雖然有啲痛，但係俾娜姐壁咚喎，反而係冇諗過今日要有動作戲，要被打、被劏、被壁咚。」而身旁嘅朱鑑然亦搞笑話：「我都有呀！我都有呀！頭先娜姐好大力捉實我手臂講對白。」
雖然兩位男士來自唔同範疇，一個夾Band一個拍戲，但係呢日拍攝時相當投契，朱鑑然話：「我原本喺個森林入面，點知下一個鏡頭就俾人綁咗喺手術床。」而Van就指：「原本我哋兩個要除衫瞓上手術床，但導演話我身型太出色，驚我啲腹肌嚇親人，所以唔使除。」