周柏豪巡迴澳門站罕有跳唱 憶與父回憶感動落淚

近年專注內地發展嘅 周柏豪 日前現身澳門舉行《「奔赴」巡迴演唱會》澳門站，柏豪相隔6年之後再次喺澳門舞台演出，唔少當地Fans加上來自香港、廣州、珠海同江門等地嘅歌迷都非常興奮，柏豪當晚面對過萬Fans亦出盡渾身解數送上精采演出。

演唱會一開始，柏豪就接連唱出《天光》、《自由意志》同《今天應該很快樂》等多首早期作品，之後又對台下Fans話：「上次喺澳門開演唱會已經係2017年嘅事，其實澳門對我嚟講係好有意義嘅地方，呢度係其中一個有份孕育同陪伴周柏豪成長嘅地方，由做新人開始，我喺澳門宣傳、辦簽唱會、開演唱會，大家都會好支持，所以好想喺呢度衷心同大家講一聲，多謝你哋。今晚我哋係雙向奔赴，我哋一齊製造我哋嘅回憶！」

柏豪巡迴演唱會澳門站日前舉行

平時教少跳唱嘅佢，呢日就落力演出《起跳》、《露齒》同《摔角》3首歌曲，柏豪話：「以前我好怕跳舞，次次公司叫我跳舞都會諗辦法耍走，不過唔知開始好想嘗試一下，然後慢慢搵到跳舞嘅樂趣，最緊要觀眾欣賞，我就會做。」之後又送上《六天》同《傳聞》兩首大熱作品。

之後柏豪換上暗黑服飾演繹Rock爆編曲嘅《金》、《比薩斜塔》等歌曲，加上《小白》同《百年不合》等耳熟能詳作品，後來再換上性感歌衫登場，又突然提起同爸爸之間嘅故事：「我細個時爸爸做手袋廠，每年開學佢都會話做個背囊俾我做書包，我一直都好期待，但過咗幾十年，呢個書包從來冇出現過，但我冇為呢件事失望。反而長大咗，我成日會拎呢件事去笑佢，而家三十幾歲，先發現呢個唔係一個背囊，而係一個可以俾我講幾十年嘅美好回憶，比我收到一個背囊更加重要。」隨後唱出向爸爸表達謝意嘅《小船大海》，熒光幕亦播出柏豪同爸爸合照，柏豪仲感動到淚灑舞台。

柏豪唔止自彈自唱，更加罕有為Fans跳唱

柏豪呢晚亦大唱佢為其他歌手所撰寫嘅歌曲，好似容祖兒嘅《天窗》同連詩雅嘅《到此為止》，之後佢又拎起結他自彈自唱鄭秀文嘅《我們都是這樣長大的》，然後再唱出道作《同天空》。

呢日柏豪同台下過萬Fans都一樣非常盡興

演唱會本來已告一段落，不過Fans不斷嘅Encore呼聲令柏豪再次登場，換上西裝煲呔現身跳唱《How Do I Look》、加上《走狗》、《還記得》、《宏願》等歌，而《我的宣言》亦壓軸登場，柏豪喺鋼琴前自彈自唱。之後柏豪仲即席於台上熄燈換衫，但全場Fans就齊齊打開手機燈照住柏豪，搞到佢尷尬咁話：「你哋好茅！其實咁樣都好光猛，哈哈！」換完衫後，柏豪再送上《最後召集》後演唱會亦圓滿結束。