由 梁朝偉 劉德華 蔡卓妍 任達華 方中信 姜皓文 錢嘉樂 陳家樂 周家怡 白只 太保等合演嘅新片《金手指》已定於12月30日全球公映，片中飾演廉政公署高級調查主任劉啟源嘅 劉德華 ，為追查由 梁朝偉 飾演嘅程一言 創立嘅大型集團倒閉真相，同妻女周家怡、楊偲泳幾番墮入險境。
華仔上陣拍攝動作場面毫不錫身，頭撼玻璃、手撼破鐡，連串激烈動作乜都有齊。佢喺動作導演錢嘉樂指導下，頭撼玻璃鏡頭一take過完成，雖然玻璃以糖膠製成，不過一樣硬度十足，華仔義無反顧一下就流暢完成動作。
另一組動作鏡頭，華仔爬上被撞至翻側嘅車頂，奮力打開車門拯救被困妻女，原本導演只需要拍攝華仔拍打車門畫面，不過即使導演叫cut，華仔仍繼續出力狂拍車門，以配合逼真氣氛，忘我演出下仲擦傷手腕，之後更從容自己處理傷口。
至於扮演華仔妻女嘅周家怡同楊偲泳被困車廂絲毫不敢鬆懈，偲泳手抱半歲大嬰孩倒卧狹窄車廂中，由於翻側車輛出入不便，佢哋索性一直屈喺車廂當中，而手抱嘅BB仲全程瞓覺乖到不得了，雖然手腳屈曲近兩小時，家怡仲要力歇聲嘶求救，不過因為各方面配合，兩人順利完成一次既艱辛又難忘嘅煞科戲份。
偲泳完成演出後仲一圓心願同華仔合照，滿心歡喜嘅佢話：「華哥知道我們今天殺青，所以比我哋早收工，臨走前特意同我哋合照留念，真係好開心。可惜媽媽(周家怡)啱啱行開咗，唔係我哋就可以可以有張全家福啦！」
家怡雖然錯失良機， 不過一樣覺得非常幸福：「今次可以飾演華仔太太已經好幸福，仲要得到佢不時指點，簡直袋錢入我袋，正如阿Sa(蔡卓妍)之前所講，有咁嘅機會要將片酬倒貼出來先得呀！」
