自TVB台慶劇《新聞女王》首播後，佘詩曼飾演主角文慧心Man姐好評不斷，飾演不畏強權「中立派」張家妍嘅李施嬅同樣贏盡正評，獲封「矚目女二」，大讚其飾演角色家妍「夠搏又有正義感」，網民力推阿佘及施嬅榮膺「雙視后」，內地更掀起「心妍CP熱」，網民笑指每日煲劇最期待畫面、就係家妍與Man姐鬥氣及鬥戲，「心妍」對壘畫面，令人想起無綫經典劇《宮心計》楊怡VS阿佘！
《新聞女王》自內地播出後掀起「煲港劇」熱潮，不少網民「不滿」劇集更新速度太慢，噚晚又以「新聞女王 文慧心別罵了」先後登上微博文娛及視頻熱搜榜首，勢如破竹。噚晚（22 號）播出呢集繼續有Man姐VS梁景仁（佐治，馬國明飾），以及「小花」Cathy（高海寧飾）VS曉薇（何依婷飾）連場惡鬥外，身為「局外人」 嘅家妍亦牽涉其中，更與芷瑤（陳曉華飾）一樣慘成Man姐棋子。事緣Man姐、佐治及家妍喺「仁心候選主席」事件各出奇謀，Man 姐與佐治爭做King Maker、家妍著力揭發仁心捐款去向！原本Man姐因葉晨（陳敏之飾）捲入醜 聞處於劣勢，最終以激將法說服葉晨將家暴事件擺上枱「博同情」，欺騙家妍交出仁心財政報告用以威脅葉晨對手細劉生（何啟南飾），反敗為勝。
家妍原以為報告終於可曝光，事後大感氣結，三人Ending喺Control Room 各有各盤算呢幕，阿佘及施嬅演出均獲激讚，尤其施嬅得悉被Man姐利用後非常激氣，配茫然眼神，網民讚「一個型、一個有氣場」。雖然家妍被譽為SNK News清泉，憑剛烈正直性格及言論贏盡網民心，但 「聖人都有錯」！
噚晚家妍「黑暗面」曝光，因過份執著追求真相，家妍竟然利用男友俊樂（高鈞賢飾）喺「仁心」嘅法律顧問身份，要求男友供出黑材料，甚至一度動歪念欲偷睇男友電腦；同時為咗達到目的、漠視男友面對危機及困境。 對於家妍所作所為，唔少網民詫異亦期待家妍似《金枝慾孽》安茜般黑化收場。繼《公主嫁到》後相隔13年再與阿佘合作，施嬅激讚阿佘EQ高：「劇本好多時係之前一、兩日先有，阿佘係好專業但又識得放鬆嘅演員，覺得（大家）係兩個極端，我做完嘢要返屋企休息同背劇本、比較緊張啲，但佢就會話： 『我哋今晚完咗一齊出去食飯』，就算通告好密都EQ好高、好有禮貌對人，唔會投訴同黑面。」
談到演記者獲讚入型入格，施嬅笑言自己「有排未夠班」：「好難同真記者比，做咗呢個角色先知做主播、記者好難，臨場反應要快，做live on air唔可以NG，難過做演員好多，我對跑新聞嘅人佩服得五體投地，自己睇住啲稿讀新聞都覺得繞口，真係拍馬都追唔上，自問做真記者未夠班。加上讀稿就算有字幕機都睇唔切，所以要一早背晒啲新聞稿都算係一個大挑戰。」
施嬅又指今次《新聞女王》喺好壓縮嘅時間好趕咁拍、又要拍好多場，冇乜時間做準備功夫。不過辛苦得嚟成個團隊好開心， 拍攝中途會一齊食飯、唱歌，令佢領悟到自己要轉變吓工作嘅心態。施嬅預告角色之後將有重大轉變：「佢喺一集之內會有好大嘅轉變，因為呢套劇嘅劇本唔會交代好多嘢，所以可能幾場戲觀眾就會見到我無端端變化好大，呢個位係難拿捏嘅…我記得化妝同梳頭工作人員睇完（個變化）都好嘩然我無端端變咗咁， 個個都好驚訝！」
台慶劇《新聞女王》逢周一至五晚八點半翡翠台播映