由無綫新聞及資訊部製作，阮小清監製、岑應編審及陳貝兒主持、一連十集的《無窮之路III-無垠之疆》逢周四、周五晚10點半翡翠台播映。本周四（23號）、五（24號）晚兩集，陳貝兒與攝製隊分別走訪有「美玉甲天下」美譽嘅和田市、塔克拉瑪干沙漠，以及有「世界屋脊」之稱嘅西藏。
和田市位於南疆塔克拉瑪干沙漠地帶係絲綢之路上嘅歷史名城，到處可見當年特色古城及宮殿。陳貝兒喺和田市去大型玉器市場見識擁有近7,000年歷史嘅「和田玉」；充滿「阿依旺」建築特色嘅和田團城、了解團城歷史及近年改變及改善；喺和田市小學見證二千多名學生一齊做早操嘅盛大場面， 更以第一身了解當地小數民族嘅上課實況。喺探訪學校過程中，最讓陳貝兒驚艷就係投資400萬人民幣嘅5G全息投影教室；身在北京嘅老師透過全息投影向學生授課，學生亦好喜歡呢位「投影老師」。
陳貝兒去當地舉行「烤羊競食大胃王大賽」，親眼目睹其中一名參賽者只係用咗5分53秒就食晒重達1,200克嘅羊肉，仲訪問到舉行是次大食比賽嘅餐廳老闆，了解佢一日高達四至五萬人民幣生意額嘅背後技巧及故事。
接住陳貝兒與攝製隊前往位於南疆塔里木盆地嘅塔克拉瑪干沙漠、尋找擁有千年歷史嘅神秘古村—達里雅布依村。值得一提就係塔克拉瑪干沙漠係全中國最大、 全世界第二大嘅流動沙漠，總面積超過33萬平方公里，即等於約330個香港面積。由於達里雅布依村位置偏僻、沿途道路崎嶇險要，攝製隊要改坐四驅車出動、更請來專業司機為是次行程開旅；雖然做足準備，眾人沿途依然問題多多， 到底最終如何一一迎刃而解？
攝製隊超過六個鐘後，眾人終於抵達古村後，拜會三代都喺古村生活嘅維吾爾族人，深入對方昔日「日曬雨淋」嘅舊居參觀外，仲品嚐當地人昔日主要食糧「泥土烙餅」。雖然呢塊餅望落又髒又硬又乾，但一心體驗當地人今昔生活嘅陳貝兒，二話不說即將烘餅放入嘴。
聽晚（24號）呢集係陳貝兒與攝製隊由新疆去西藏拉薩，深入體驗「藏傳佛教」各大廟宇、儀式及信徒修行日常，最特別就係到訪一間由香港人開設嘅港式茶餐廳，喺異地大歎港式雲吞麵及魚蛋。現年70多歲嘅張伯當年曾喺香港開IT公司，因退休後偶然去西藏旅行，從而決定喺當地展開「第二人生」；談到喺拉薩經營食店，張伯笑言成本不用10萬，而且一年只須開8個月便足以維生，張伯笑言：「賺夠咪休息吓，其餘4個月就返香港或者去吓旅遊。」 陳貝兒歎完港式美食，亦有專誠前往品嚐「藏餐」，品嚐當地人主食—糌粑外，仲試食一碗由氂牛粒、青稞粒、小麥粥及燉蛋炮製而成嘅特色美食，到底呢四種食物溝埋一齊係咩味道？
第6集另一個亮點就係西藏女子抬頭嘅故事，喺舊西藏被視為最低等級人種，舊西藏女性接受基本教育嘅機會欠奉，自1959年農奴制度被廢除後，地位逐漸被提高，是集陳貝兒先後拜會西藏第一代女醫生，以及年僅26歲西藏直昇機飛行員堅熱益西；陳貝兒採訪堅熱益西過程中，更順道體驗「西藏版衝上雲宵」，坐喺堅熱益西駕駛嘅直昇機上、俯瞰西藏地標及美景，實行空中暢遊聖城！
《無窮之路 III-無垠之疆》逢周四、五晚 10:30 翡翠台播映