叠影狙擊丨「港版孔劉」張松枝演高智天才罪犯 黃浩然為娜姐笑言要捽死情敵

曾獲封「港版孔劉」嘅張松枝，喺《叠影狙擊》入面飾演表面上仁心仁術，實質係智商高達 160 嘅天才罪犯，專做黑巿器官買賣嘅「教授」。而喺24號晚播出嘅一集，張松枝仲會割喉殺害于洋，為逃捕而綁架無辜巿民。
張松枝將會殺死于洋。
為咗教授呢個角色，松枝話自己同導演都花咗唔少心思：「教授覺得其他人好愚蠢、可以將佢哋玩弄於鼓掌之中，我就特別以淡淡哋嘅笑容去表達自己與眾不同。」松枝仲話無論說話定係步行，都盡量希望表現出王者風範。講到劇中要割喉殺害于洋，松枝搞笑咁話自己殺咗對方好多次：「佢係好貪玩嘅人，好多時大家忍唔住笑， 所以我殺佢殺咗好多次，拍出嚟效果好好。」
張松枝有「港版孔劉」之稱，同時亦係型佬一枚。
對於教授嘅型佬造型，松枝歸功於化妝師：「我本身冇咁多白髮同白鬍鬚，化妝師每次幫我加工都好快，塗咗白髮水 10 分鐘就有效果，我覺得呢個形象好新鮮，造型夠特別！」而為咗保持佢嘅型佬狀態，松枝話除咗戒消夜外，每日兩餐都係少肉多菜，每日最多食一次飯，同埋平時多做帶氧運動。
黃浩然對偽女友周秀娜照顧有加。
另一邊廂，曾自封「暖男反派」嘅黃浩然，喺劇中同周秀娜扮情侶時，親手為對方戴頸鏈，場面溫馨；之後喺Mag姐(張慧儀飾)追殺娜姐時，又力保對方護花，令暖男形象升溫。入戲甚深嘅黃浩然，喺受訪時仲搞笑咁當「情敵」黃宗澤冇到：「我係富商，一隻手指可以捽死 Bosco，唔會放佢在眼內，劇中佢係警察想拉我， 由頭到尾咬住我唔放，但一個聰明嘅罪犯唔會主動撩警察拉自己。」提到唔少網民懷疑佢劇中心腹韋霆釗(胡卓希飾)對佢有「hehe 情」，浩然講笑咁話與胡卓希、娜姐確實陷入三角關係，仲劇透兩人遲啲仲會兄弟決裂！

《叠影狙擊》逢星期一至五 21:30 翡翠台
黃浩然曾自封「暖男反派」。黃宗澤係黃浩然劇中嘅情敵。