姜皓文早前返到家鄉馬來西亞拍攝嘅懸疑劇情片《鎖戰》，電影唔只成為疫情後非賀歲檔最高票房嘅當地中文電影，更由16號開畫以嚟，連續七日成為中文電影票房冠軍，票房衝破130萬港元票房，大破港片喺馬來西亞嘅票房紀錄。
由於馬來西亞電影市場不及海外其他市場大，所以今次可以奪得佳績，成個電影團隊都相當振奮，黑仔更形容為呢套係佢從演以嚟自己滿意嘅一部作品：「在數個首映禮上都反覆觀看了這部作品多次，覺得這是自己從演而來，當中表現的情感最為細膩的一套戲，真的很滿意，很喜歡。」而為了為電影宣傳，今次黑仔罕有地去到東馬沙巴、 古晉等地宣傳。 
提到戲中一埸揸電單車戲，黑仔話自己其實好喜歡揸電單車，但因為香港排期考牌要差唔多兩年時間，所以今次可以喺戲中模擬揸車令佢覺得好開心，笑言簡直係寓工作於樂趣。
今次黑仔喺馬來西亞宣傳大概會逗留二十幾日，而且有太太陪同去怡保等地出席首映禮，同行仲有同片演員高海寧、許紹雄、黃浩然等，見到當地fans咁熱情，黑仔表示相當開心。
黑仔嘅外婆係馬來西亞人，所以對於呢個地方特別有親切感，黑仔話：「雖然找不到我的親戚，但大家都好似我的家人一樣，由上機到落機都被問『你返嚟喇？』、『你返屋企呀？』，就連當地地勤都說『歡迎你回來檳城』，覺得非常窩心而且親切。我在馬來西亞、檳城都有很多朋友，電影更在檳城進行拍攝，所以大家都當我是半個檳城人及家人一樣，相當開心。」
