炎明熹（Gigi）呢日現身香港街頭及多個景點拍攝音樂旅行真人騷《唱遊大灣區》，藉住呢個機會走遍香港大街小巷，Gigi坦言好鍾意呢種感覺，雖然呢日佢冇塗防曬，不過曬太陽都係好嘅。
節目組除咗喺香港取景，仲會去內地多個城市探訪，帶大家體驗大灣區國家級非物質文化遺產項目，其中一個目的地就係Gigi經常演出嘅地方—廣州，Gigi以往到廣州係工作為主，今次親身去遊玩同見識，令Gigi非常開心！
Gigi呢次學過粵劇、舞獅同詠春等，Gigi回想置身粵劇後台準備化妝時，見到一排粵劇老師坐咗喺度，聽到開場配樂，Gigi頓時覺得好神奇、好特別，有啲似喺電影入面，Gigi忍唔住想喊，另一個體驗活動就係詠春，Gigi獲讚有天賦，佢有即場示範詠春招式，更指有意繼續學習強身健體。
