有唱片公司動員旗下歌手舉辦一連串大學School Tour，尾站日前 喺 香港教育大學中央廣場舉行。 馮允謙 梁釗峰 雲浩影 ANSONBEAN Nowhere Boys 同埋近日先出道嘅新女團 Me& 首次參與表演，吸引數百名師生捧場，仲企滿兩層校舍，氣氛非常熱鬧。
呢日演出由ANSONBEAN打頭陣，佢接連跳唱多首強勁歌曲，全場都尖叫又舉手跳舞，氣氛高漲。表演完後一眾同門兄弟姐妹仲突然捧出生日蛋糕，為22號踏入23歲嘅佢慶祝生日，全場又大合唱生日歌，令佢非常驚喜，釗峰仲飛撲送上香吻。
釗峰緊接出場表演時，又滿場飛同圍觀嘅同學隔空比心心，之後 譚旻萱 黃淑蔓 同 連家穎 組成嘅全新女團 Me& 登場。Feanna興奮咁話：「我哋出道咗兩個星期，今日係第二次公開演唱，好開心！」之後跳唱新歌《Eye to Eye》令全場high爆，然後Cloud同Nowhere Boys仲有Jay Fung輪流登場演出。
今次School Tour 早於10月已經開始，先後喺理工大學、浸會大學、中文大學、香港大學到呢次教育大學演出，由室內唱到戶外，由天光唱到黃昏，每一站師生都非常熱情，完成最後一場表演後，釗峰話：「最近因為呢個School Tour成日都見面好開心，不過今日唱到尾站，好唔捨得！」今次釗峰、Nowhere Boys同Cloud嘅出席率都滿分，釗峰仲自稱係「駐場歌手」，Van更笑言大家係「School Tour之霸」。
Van話：「我感受到好多『青春』，校園生活距離我哋好多年啦！」又表示最難忘係返到母校港大表演，重踏校園回憶湧現：「當日我經過一個建築物，突然好想嘔，因為當年我就喺嗰度經歷過無數通頂衝Final Projert，甚至沖涼同瞓覺，之後每當我經過嗰度，身體就出現特別反應。」
而Jay Fung就對一眾同學話：「其實讀書真係要搵方法釋放壓力，所以今次我哋嘅音樂會係好好嘅方法，無論喺學業或生活上有咩壓力，都希望佢哋聽到我哋唱歌感到快樂。」而大家仲話希望之後可以去唔同小學，甚至幼稚園舉行School Tour，同小朋友一齊唱遊呀。