G.E.M.鄧紫棋 早前喺內地綜藝翻唱多首經典國、粵語歌曲，6首歌曲包括《情人》、《唯一》、《李香蘭》、《11》、《你成為了誰的幸福》同《海闊天空》，除咗網上嘅Live版本外，亦會收錄喺佢嘅全新EP《T.I.M.E.》中。
佢嘅《光年之外》MV成為健力士世界紀錄YouTube觀看次數最多嘅中文音樂影片，亦成為首位有5首MV破億點擊嘅華語歌手。新EP特別收錄人生不同階段中受觸動嘅作品，除咗香港觀眾都耳熟能詳嘅Beyond作品《情人》、《海闊天空》同歌神張學友嘅經典《李香蘭》之外，亦包括新生代樂團告五人嘅神曲《唯一》同網絡神曲《11》，加上改編自歐陽娜娜英文歌《The Best For You》嘅《你成為了誰的幸福》。
G.E.M.亦親自改編《唯一》同《11》嘅詞曲，又重新為《你成為了誰的幸福》填寫中文歌詞，EP中每一首歌曲都經過佢同製作人T-MA馬敬恆精心挑選、改編共同製作。
日前佢亦宣布她將正式展開新一次世界巡迴演唱會，睽違六年嘅消息一出馬上引發歌迷熱烈討論！今次巡迴已落實於廣州、南寧、深圳、泉州、北京、上海等城市舉行，又正安排到全球各個城市演出。