利智自從同李連杰結婚後就淡出幕前，專心照顧兩位愛女。今年初李連杰就上載咗同老婆利智、以及兩個女去尼泊爾旅行嘅合照，當時已經有唔少人指久未露面嘅利智保養得宜，完全睇唔出已經係60＋嘅美魔女。
而最新為新書《超越生死》四出宣傳嘅李連杰，日前佢就同楊小娟、呂良偉聚舊兼送書，事後小娟仲及喺社交平台發帖文，講自己對呢本書嘅讀後感，當中仲貼心咁配圖，除咗有當日與李連杰見面嘅合照外，仲有一張佢同老公呂良偉、李連杰、以及好耐冇公開露面嘅利智嘅合照，而帖文一出後，又令大家聚焦喺呢位激罕露面嘅美魔女身上！
小娟喺帖文入面表示自己同李連杰識於微時，對方總會帶畀佢好多人生感悟，小娟又指自己拜讀完對方新作後，有深深嘅體會同感動，帖文中小娟表示：「無論你是他的粉絲，還是對人生充滿疑惑的年輕人，這本書都會給你帶來啟示和勇氣。通過閱讀《超越生死》，你將了解到李連杰如何在困境中堅定信念、如何在挫折中勇往直前、如何在榮譽與名利中保持清醒的頭腦。這本書不僅會讓你對生死有更深刻的理解，還會幫助你找到內心的力量，從而更好地面對人生的挑戰與困難。」所以佢極力推薦畀大家呀。
