凍齡美男子關智斌（Kenny）噚晚喺社交平台貼出三張近照，其中一張進化圖，明顯見佢受咗傷，原來Kenny兩個星期前發生家居意外，臉部受咗二級燒傷，「一個Gas漏氣，一個大意的點火行為，換來我面部和手部的二級燒傷」。
Kenny記得意外發生之後，幸好做咗一個拯救自己嘅行為就係「不停用凍水洗面」，慢慢回過神先發現自己頭髮同眉毛都燒焦咗，而且面部同嘴唇都變得紅紅腫腫，頓時感到不知所措同非常驚恐，剩係記得心跳得好快，六神無主咗5分鐘先識得叫車去醫院。
Kenny燒傷後仍出席過活動，佢回想11月17號出席活動時，有粉絲問佢點解戴手套，以為佢係因為天氣凍，鼻頭先變得紅紅哋，仲開玩笑話以為佢做咗豐唇手術，其實當時係Kenny啱啱係燒傷咗嘅第二日，Kenny表示因為主辦方已為佢嘅行程延期過一次，覺得自己有責任完成工作，所以當日Kenny帶傷上陣，並冇告知大家呢個意外，只係盡量用化妝去掩蓋。
Kenny經過一星期嘅脫皮，推掉一啲job同好友蔡卓妍（SaSa）生日派對，再將燒焦嘅頭髮剪掉，經過專科醫生嘅治療，Kenny奇蹟地喺一星期之後基本上已完全康復。Kenny對於自己復原同新增代謝速度感到驚訝，經過呢個星期嘅悉心護理，佢有不停塗藥膏、不停躲開太陽，除咗眉毛仲未完全長出之外，基本上已完完全全康復，Kenny亦好感謝呢一段時間照顧佢嘅每一位，曾諗過上載啱啱燒傷後嘅相片，但Kenny諗諗吓都係唔好嚇到大家，不少圈中好友留言表示驚訝，容祖兒就話「好彩仍然靚仔」!