TVB台慶劇《新聞女王》噚晚（6號）呢集講方太（龔慈恩飾）展示比Man姐（佘詩曼飾）要強勁嘅「超級氣場」。親自殺回SNK處理性騷擾風波嘅方太，聽到飛爺（鄧智堅飾） 懶醒指已就事件「白紙黑字」向員工落封口令，方太先扮和顏悅色：「飛仔呀，我哋做新聞㗎可？！」方太即扯火表示唔理佐治（馬國明飾）同阿Man係咪身有屎，大不了炒咗佢哋，再指飛爺以公司名義白紙黑字叫員工收聲：「我哋仲有冇公信力？」龔姐更邊講邊連拍兩次枱，嚇到飛爺口震震欲以「大意」抵賴，方太最後一句ko：「你係想卸責！」
雖然場口對白又長又多，但完全未有難到演戲經驗豐富嘅龔姐，透露場口一take搞掂：「唔同角度都take咗一個take，難度在於拍正面同反面時點樣令到啲動作連到戲，呢個要好小心咁記住。」問到拍枱發火有冇嚇怕堅叔，龔姐笑言：「堅叔梗係冇畀我嚇親，你哋依家見到嘅堅叔，係佢演得好、人物嚟㗎咋。其實我聽佢啲學生講，佢上堂好有威嚴！」龔姐更搞笑澄清：「唔好淨係記得我鬧人先得架，我以前做過唔少柔弱角色㗎！」
噚晚方太與家妍（李施嬅飾）一席話亦字字珠璣，以精警政治論遊說家妍成為SNK第三把交椅：「政治唔係為咗鬥爭，係為咗和平。如果兩個人捉一盤棋，只會有鬥爭，但有第三個人，就會有政治。」方太政治論喺內地首播後火速於香港及內地引發迴響，網民將相關金句截屏上載互聯網：「方太把辦公室政治玩得明明白白」、「方太真的是充滿了大智慧」、「跟着新聞女王真的是能學到好多知識」。
今晚（7日）方太將再度發功，以「手袋論」勸已升為高層嘅Man姐放寬心胸，其中以舊款手袋比喻飛爺，龔姐肢體動作配以對白讓人動容：「我都知佢甩甩漏漏，但有時用袋唔係講實用，而係講情懷。」龔姐受訪時坦言為場口做足功課：「因為我講到每個員工時、會因應每個人畀我嘅感覺、喺態度上有少少差別。」一波未平、一波又起，今晚呢集輪到曉薇（何依婷飾）陷入大危機！貧苦家庭長大嘅曉薇，因母親（黎燕珊飾）執垃圾養家深感自卑，喺同學面前唔敢認母，更附和同學拎汽水罐掟阿媽；曉薇嘅自私行為惹怒妹妹曉欣，二人自此勢成水火…
台慶劇《新聞女王》逢周一至五晚八點半翡翠台播映