陳嘉桓同舊經理人公司16長約結束後，Rose就化身國際身心靈發展協會創會副主席同國際皮紋學總會副會長，最近更兼任埋香港海洋清潔大使，工作可以話係排山倒海而來呀。
近日Rose就現身力撐好友楊懿珈(Arielle)創立嘅醫美中心，近年開始接觸醫學美容嘅Rose話：「年齡唔同需要做嘅項目都唔同，加上而家嘅醫美越嚟越進步，大家都大膽分享自己做咗啲乜嘢項目。」
Rose又提到而家不時有突發性工作同教班，不時要保持最佳狀態，Rose提及經歷疫情後，唔少人喺除低口罩後產生「容貌焦慮症」，仲自爆自己都有近似情況：「以前經理人公司比過唔同意見、評語，覺得我長髮適合唔同類型工作多啲，我就好想用返原本嘅短髮，但為咗工作要駁長髮。」
直至去年踏入30歲，Rose覺得唔應受外界嘅評語影響，於是保持短髮。佢話：「有冇焦慮主要係睇自己內心夠唔夠強大，多啲自信心，日常改變飲食、作息時間，慢慢改變發自內心嘅美。」Rose認為：「喺追求美麗嘅過程中，我哋唔可以忽視內在嘅健康同平衡，變得好睇並非只追求完美嘅外表，亦要擁有獨一無二嘅內在美」。