有保險公司於澳門旅遊塔戶外廣場舉辦慈善活動，仲邀請咗大馬女神 林明禎 張天賦 Tyson Yoshi 瑜伽達人 Coffee 林芊妤 同 亞運武術澳門冠軍運動員 黃俊華 同一眾高層一齊參與，同廣大市民一齊健身運動，又一齊玩層層叠，刺激又緊張。
林明禎、MC同Tyson Yoshi被過百Fans爭賭偶像風采，而佢哋亦親民走近同大家合照，MC接受當地電視台訪問時，仲應主持要求即場做掌上壓，早前於當地開騷嘅MC，呢日再次到訪澳門非常興奮，又笑言：「今日活動好早舉行，所以晨早7點半就起身沖涼，本來好驚太早起身未開聲會影響唱歌，點知頭先做完簡單運動把聲都開埋，所以運動非常重要！」
而Tyson Yoshi亦大騷肌肉帶領全場朋友做健身運動，又落台同市民近距離拉筋，佢話：「我為體態會控制節食，雖然自己食量好大，不過會保持飲食健康，尤其就快舉行演唱會，自己容易爆暗瘡，飲食要更加清淡。生活習慣一樣重要，我自己唔食煙唔飲酒，希望良好習慣可以令我身心都健康。」
至於第一次玩層層叠嘅林明禎興奮又開心，仲話自己提早一日到澳門四處遊覽，仲大嘆最愛嘅葡撻同馳名魚湯粉，不過Fit到漏嘅佢就話自己同宵夜絕緣喇：「運動同睡眠對健康身體都好重要，流汗可以加速新陳代謝，平時我成日做瑜伽保持健康，以前工作壓力大，適當運動仲可以幫助減壓。」
