歌唱真人騷《中年好聲音2》噚晚播出第六部曲《廿一強全新賽制 動感/情感PK賽！》嘅上半場，經過一輪激戰之後，安雅希同古淖文齊齊獲得全晚最高86分，而麥素華就被淘汰。
獻唱《心如刀割》嘅安雅希迎戰獻唱《失戀無罪》嘅陳俞霏，結果以4分之差揮低對手直接晉級。安雅希透露原本打算挑戰唱快歌，不過因今仗PK賽嘅關係，最終打穩陣牌，選擇唱情感揮灑嘅歌曲。
上回合已破紀錄得93分嘅佢，今次演出雖然未及上次表現，不過依仍然有不俗發揮，評判張佳添仲笑言：「有個唔係太高興地方，就係點解隻歌咁短，覺得唔夠喉！」同樣唔夠喉嘅仲有肥媽，佢更由袋中拎出紙巾話：「你知唔知我袋定嚟，但今日隻歌太短，冇整到我喊，上次 喊到我鼻水都流埋，但今次冇用到，你自己檢討吓！」場面搞笑。
至於獻唱《失戀無罪》僅敗嘅陳俞霏繼續收埋Hyper個性，可惜高音仍被指吵耳，周國豐指：「今日高音嘅位，係聽得出有啲嘈同埋吵耳。」而陳慧嫻就持唔同意見，佢話：「你把聲好清、好脆、好響，佢哋可能覺得你爆，但我覺得係你性格嚟，Overall嚟講我係鍾意。」
「最強素人」譚輝智今次再度發功，深情獻唱王力宏嘅《Kiss Goodbye》，婉婉仲直指佢膽生毛，連肥媽亦為佢捏一把冷汗：「一睇到王力宏，擔心你會唔會揀錯歌，但你真係唱得好入戲，真係好鍾意輝智，你令到好多素人有希望。」而封輝智為「羅啟豪2.0」嘅張佳添亦再次大讚：「你嘅潛質可以向羅啟豪方向邁進，你係一塊再要雕琢嘅玉，雕琢完之後就係塊翡翠！」
至於上回合唱到喊嘅古淖文呢集亦「撈」味回歸，獻唱《Monica》嘅佢又唱又跳，不過一股「江湖味」出嚟下最終獲86分。曾讚佢有巨星風範嘅陳慧嫻笑言：「你話要減江湖味，但始終都喺度。」伍仲衡則指：「你每一個字後面都 有個『啊』字，呢啲我通常係聽尹光先聽到，但你又冇尹光嗰種個人Style。」肥媽同時稱：「我好少同意佢(伍仲衡)，今日我都同意，唱到有啲粵曲Feel。」
《中年好聲音2》 逢星期日晚 21:00 翡翠台