由 梁朝偉 同 劉德華 再度合作嘅重頭新片《金手指》月底就會全球公映，電影公司舉行終極預告片首播發佈會，導演兼編劇莊文強、監製黃斌加上扮演警察嘅動作指導 錢嘉樂 周家怡 陳家樂 白只 岑珈其 洪卓立 楊天宇 楊偲泳 李靖筠 何啟華 朱鑑然 胡子彤 吳肇軒 同 徐浩昌 齊齊現身為新片造勢。
呢日亦同步推出由金像美術指導 張叔平 設計嘅兩款國際版電影海報，又宣佈將舉行史無前例嘅「股票變戲票」活動，觀眾憑80年代轟動全亞洲牽連甚廣嘅已倒閉佳寧公司股票正本，免費獲取《金手指》電影換票証，認真噱頭十足。
新片由梁朝偉飾演嘅嘉文集團主席程一言同劉德華飾演嘅廉署高級調查主任劉啟源雙雄對決，人物關係錯綜複雜。而周家怡呢日就指有機會飾演劉德華妻子係成就解鎖，片中有一幕仲要對梁朝偉動粗，要極大勇氣去應付演出。
而扮演劉德華同周家怡之女嘅楊偲泳就分享劉德華親身上陣拍攝撞車場面嘅震撼：「見到華哥親身上陣，爬上翻側嘅車上全力拯救我同媽媽，令我由心底感動出嚟！」
至於飾演廉署職員嘅朱鑑然，就指有幸同兩大男神同場非常高興喇：「佢哋合體劇令所有在場人士同時入戲，更能夠投入角色。」至於另一位廉署職員吳肇軒喺片中係一位數學天才，悉破破案關鍵，引發劇情轉捩點。
飾演嘉文集團秘書；同偉仔又唔少對手戲嘅李靖筠，就對同兩位偶像梁朝偉同劉德華有對手戲興奮又緊張。白只飾演金牌股票莊家，佢仲感謝主要對手梁朝偉同蔡卓妍抽時間幫自己作準備。而飾演任達華兒子嘅岑珈其就話戲中同四位影帝都有對手戲，呢次偷師機會可遇不可求喇。