自劇集播出後一直由頭帶到尾嘅 佘詩曼 喺星期一晚一集再創「癲」峰，劇情講述Man姐因萬華女排性侵事件，被前隊長陸詠恩( 胡美貽 飾)放Man姐飛機令SNK「開天窗」兼淪為話柄，遭飛爺( 鄧智堅 飾)同梁景仁( 馬國明 飾)夾攻寸爆。同時網誌部嘅阿Roy( 鄭衍峰 飾)亦亂入向 Man姐發警告信。
事後阿Roy承認受飛爺指使，當證實所有事都係飛爺搞鬼後，Man姐只肚出「明晒」兩字，不過短短15秒阿佘卻就以眉目、眼神同嘴角變化，演繹「原來真係咁」、「明晒」、「又玩到咁低手呀？」演變出唔同情緒變化；當中眼神飄向飛爺一幕仲非常凌厲，難怪觀眾激讚阿佘每一格都係戲啦。
而Man姐同子傑( 譚俊彥 飾)噚晚兩場對談戲亦極有睇頭，除咗充滿佈粉紅色氣泡同做人哲理，Man姐喺子傑面前展現嘅女友一般「任性」、「傲氣」、「得勢不饒人」同身處工作當中時相當大反差。
而呢集Man姐主動向張家妍( 李施嬅 飾)提出聯手處理萬華女排性侵新聞，仲攻心以「全個電視部最做到嘢係你」仲有「見到唔公平嘅嘢你忍到手咩？」吸引對方答應。雙劍合璧嘅「心妍 CP」，調查期間發現有律師介入事件，從而斷定萬華教練有可疑，仲鎖定萬華隊長廖子珊( 何沛珈 飾)。
心妍CP喺茶餐廳老闆榮哥( 彭懷安 飾)協助下，令子珊喺「被搭枱」情況下備受連環迫供； 兩人一唱一和指桑罵槐向子珊說教默契十足， 無論眼神、小動作及對白都夾到不得了，獲觀眾大讚係全劇最佳拍檔。雖然攻勢天下無敵，不過最終再因報道鬧翻，家妍仲因而性格大變兼走上不歸路…
早前受訪時曾感激阿佘同施嬅鼓勵嘅Roxanne，呢場面對兩大好戲前輩「夾擊」表現絕不失禮，尤其含淚食三文治內心充滿掙扎、以及面對著鏡頭一幕長達兩分半鐘獨白戲，都一次過演繹出自嘲、自責、憤怒、委屈、倔強等多重情緒，被讚交足功課。
《新聞女王》星期一至五晚 20:30 翡翠台