下個禮拜就會踏入結局周嘅《新聞女王》，12號晚播出嘅一集，講到Man姐（佘詩曼飾）為咗令萬華女排前任同現任隊長訪問順利播出，竟然無視萬華向法庭申請嘅匿名令，等張家妍（李施嬅飾）報道新聞；事後不甘無及時被通知嘅家妍殺入Man姐office理論，怒火中燒兼失望含淚話：「我仲傻到覺得我哋以後可以繼續合作，但原來唔可以，我哋價值觀爭太遠。」最終SNK News被判藐視法庭，當時以主播身份報導事件嘅家妍則成為犧牲品、由電視部被調往紙媒，成為家妍黑化嘅重要轉捩點。遭「貶職」嘅家妍原本對轉任紙媒仍抱有期望，可惜入職即遭上司潑冷水，令家妍不勝唏噓…
同樣因Man姐被貶往網誌部嘅曉薇（何依婷飾），喺新認識朋友Slash（馬貫東飾）嘅協助下，獨家拍到「私竇酒吧利益輸送，政商界隻眼開隻眼閉」嘅獨家新聞；不過因行蹤敗露遭黑幫追捕，幸好佐治（馬國明飾）及時趕到救走！一心想憑該段獨家新聞返回電視部嘅曉薇，最終再因Man姐阻撓令報導石沉大海，忍無可忍嘅曉薇主動搵Man姐理論，卻意外得到返回電視部嘅機會！
而13號晚嘅一集，重返電視部嘅曉薇將會性情大變，出名順從上司嘅佢，竟然背住Man姐播出被禁嘅新聞，事件令Man姐由天堂跌落地獄，亦令曉薇喺谷底反彈、由假學歷主播躍升「正義女神」…
噚晚劇集嘅亮點係同樣叫雙飛角逐飛躍及配角獎項嘅馬貫東同羅毓儀（Yuki）同場，飾演電召車司機Slash嘅馬貫東將介入佐治同曉薇戀情，Yuki則客串飾演酒吧女侍應，雖然出場時間唔多，但已前後換咗兩個造型，亦引起網民關注。而早前憑《破毒強人》中杜飛一角贏盡好評嘅馬貫東，雖然今次無飛身躍入車廂嘅震撼場面，但自16集出場後一直默默守候喺曉薇身邊嘅佢，憑藉窩心無私舉動同可愛笑容成功入屋；噚晚Slash陪曉薇等候獨家新聞時，因驚青過度做出唔少失禮行為，其間馬貫東展現嘅強顏歡笑同「驚青表情包」均甚有喜感，獲網民力撐今年能成功獲得獎項肯定。談到「雙馬爭一何」，馬貫東同馬明各有支持者，前者被指同依婷配搭有新鮮感，後者則被指噚晚殺出「英雄救美」一幕相當有型，除咗大讚佢哋相處甜蜜又合襯，仲有愈嚟愈多網民力撐佐治對曉薇係真愛而唔係利用。
馬貫東早前接受《無綫娛樂新聞台》主播潘盈慧訪問，大談入行16年點滴，仲曝光咗昔日胖嘟嘟嘅可愛相片。馬貫東透露自中二、中三加入話劇社後就對演戲產生興趣，仲透過喺21期藝員訓練班正式入行。馬貫東話入行頭六至七年嘅角色都未有太大發揮，好多角色甚至無名，但係佢完全無感到灰心：「始終都係鍾意呢一行。」直至遇上《鐵馬戰車》同《愛‧回家之八時入席》，馬貫東開始入屋，佢坦言《愛‧回家之八時入席》係佢人生好重要嘅里程碑，仲話同黎耀祥合作，令佢演技進步唔少，佢話：「同佢（祥哥）做戲冇壓力，因為你點做佢都可以接到你畀番你，佢唔會控制你話：『你呢句要咁講，我先可以咁講』。」講到《那些我愛過的人》中飾演嘅古醫生，馬貫東直認難度高達9.5分：「真係好難，要冇表情同埋要同時間顧好多嘢，唔可以畀人覺得亞氏保加症係傻的。」問到入行多年最深刻事件，他坦言曾經被合作嘅演員掟劇本，至今一直未搵到背後原因：「我到依家都唔知原因係咩，但大家對緊稿時跟住無啦啦掉我劇本，跟住我呆咗點解要咁做嘅？」
《新聞女王》星期一至五晚20:30翡翠台
