一連六集嘅全新飲食節目《溜走的真味》喺今（14日）晚首播，節目由獲提名《萬千星輝頒獎典禮2023》「飛躍進步男藝員」及「最佳男主持」嘅林正峰、「粵菜名廚」蕭秀香（三姐）同「潮州菜名廚」許美德（德哥）擔任主持，仲分別邀到媽咪係潮州人嘅薛家燕、同屬潮州人嘅陳煒，仲有楊潮凱擔任嘉賓。
《溜走的真味》帶觀眾嚐盡潮州菜原味道，除咗搵嚟「音樂情人」鄭子誠「真味導航」，介紹潮州各式地道美食嘅歷史同小故事外，製作組仲出動航拍機、以獨特又唯美嘅角度拍攝城巿同鄉郊風貌。三位主持同嘉賓走遍潮州古城、廣濟橋、老媽宮同南澳魚巿場等知名地標，嚐遍地道美食；另外三姐同德哥每集都會大獻身手，前者負責炮製簡單易做嘅特色潮洲家常菜，後者就偏向表演廚師刀法同功架。
今（14）晚播出嘅首集亮點有「全鵝宴」，當中兩味特色菜「翡翠鵝掌凍」同「陳年滷老鵝頭」令主持同嘉賓讚口不絕；而街邊小店嘅超Q彈「滷水豬腳」亦相當出色，家燕姐邊食邊搞笑話：「豬腳嗰啲呢，以我咁嘅體態唔敢點食嘅，但呢度好有名同傳統煮法好正，幾歹都要食！」破戒為美食「獻身」。至於之前憑晒肌相贏盡關注嘅林正峰，喺潮州澄海區嘅獅頭鵝養殖場大顯身手，兩三下手勢已捉起重達十多公斤嘅獅頭鵝，力度與靈活度兼備。
聽（15）晚播出嘅第二集，四位大歎「即劏即食」潮汕牛肉火鍋，嚐盡五花趾、匙仁、吊龍、胸口朥等美味部位。德哥席間搞笑大爆全靠家燕姐先獲店家送上矜貴靚部位款待，「大開食戒」嘅家燕姐則搞笑自嘲：「我今日變咗肥牛呀！」其後眾人「轉場」歎專人手打嘅牛肉丸同牛筋丸，品嚐牛大骨熬製嘅清湯，薛家燕姐飲咗「頭啖湯」後，即《食神》「味公主」上身、一臉滿足兼滔滔不絕大講口感：「啖湯真係好清甜，好有牛骨嘅味道！」重現經典。
年幼時曾經喺潮州讀學前班嘅林正峰，受訪時坦言難忘家鄉情懷：「細個經常去鄰居屋企同其他小朋友一齊玩，我哋所有嘢都一齊分享。」提到重遊舊地，正峰笑指自己變咗「吃貨」：「一日要食六、七餐，同埋當地太多美食；不過自己想上鏡好睇啲所以都有忍口，拍攝完就盡量食番少啲，好在之後冇肥好多磅！」講到首次同家燕姐合作，正峰激讚前輩精力充沛：「因為行程都好chur，由清晨拍到夜晚、車程又次次都好長，但家燕姐好犀利，依然好有活力，玩得又講得，好專業！」
正峰喺節目中晒廚藝擔任三姐助廚，佢笑言係處男下廚：「平時喺屋企食就食得多，但好少自己煮，所以今次我主要係幫手，但都會搞搞震，原來我哋兩個啲火花都幾好笑！」談到徒手捉鵝，正峰說：「喺養殖場捉鵝其實好好玩，自己未見過咁大隻鵝，佢哋好可愛；不過嗰日潮州有颱風預警，拍完捉鵝就要趕返香港。之後再返潮汕拍過，所以《溜走的真味》前前後後都拍足一個月。」
《溜走的真味》逢星期四、五晚10:30翡翠台