Benz雄嫁女丨宣萱歐陽震華停車場偶遇興奮過龍 爆笑聚舊唔記得拎人情

「Benz」許紹雄一向圈中人緣極佳，今日佢愛女許惠菁（Charmaine）出嫁，喺港島區擺酒，不少圈中人陸續到賀，宣萱、歐陽震華同江美儀一同在場。

宣萱及歐陽震華受訪時笑指大家喺停車場撞到，好友見面份外高興，二人爆笑稱因見到對方太開心，一時之間唔記得拎人情，二人分別漏咗喺自己座駕，歐陽震華指一陣要行15分鐘去停車場拎，不過身旁嘅宣萱就慘啲著住斗零踭，歐陽震華笑言叫宣萱問人借球鞋，江美儀則笑言幸好喺半路偶遇佢哋兩個，所以自己有記得拎人情！

歐陽震華有老友郭晉安捱義氣陪佢行返去停車場，幸好中途遇到梁思浩揸車經過，佢哋急急腳上車，回座駕拎人情，歐陽震華描述整個過程亦相當搞笑，歐陽震華由於趕去停車場，搞到滿頭大汗，歐陽震華再受訪時指似「步行馬拉松」，更笑祝Benz連生貴孫！

歐陽震華與宣萱一直係最佳收視螢幕CP，呢對黃金拍檔形象入屋，於1995年首合作拍《壹號皇庭IV》，之後接連拍《美味天王》、《洗冤錄》、《賭場風雲》、《施公奇案II》等經典作。