以「聖誕驚喜限定，爆發戀愛共鳴」作宣傳招徠嘅新劇《妳不是她》，以50%奇幻及懸疑＋100%貼地角度探討「何謂真愛」，同時亦係丁丁與Fyy與首度升呢做男、女一嘅作品，而劇中郭柏妍Rosita亦會首度突破清純框框，飾演愛扮弱勢扮無辜嘅「綠茶女」，將期待度拉滿。
《妳不是她》講述長唔大兼冇擔帶嘅林信（丁子朗飾），同生活有規律兼做事認真嚴謹嘅夏莉（馮盈盈飾）拍拖兼同居三年；雖然明知性格不合兼熱戀褪色，但二人均選擇默默忍受，直到一場嚴重車禍後，夏莉自此性情大變，由「苦悶情人」變身「趣味情人」，除咗任勞任怨兼服侍周到，仲要玩得、Talk得兼識拆彈。縱然聽落「筍到爆」，但各種跡象都顯示夏莉相當有可疑，林信亦覺得親密枕邊人漸趨陌生，最終更發現夏莉一個驚天大秘密。
喺劇集宣傳片入面，Fyy同丁丁愛得相當甜蜜癡纏，唔少鏡頭都好似連體嬰咁黐到實一實，其中一幕「愛的孭孭」，唯美畫面加上冧爆表情，令人更期待佢哋喺劇中互動。佢哋受訪時坦言係拍劇以嚟與拍檔最多親密接觸一次，Fyy話：「係入行以嚟最大挑戰，監製April有事先講明親熱戲有訊息，係想透過我哋嘅互動同交流帶出情侶嘅感覺，令觀眾感受到愛情嘅力量同火花。」
而丁丁則表示劇中有好多吻戲：「呢套真係好多錫錫戲，因為係純愛情劇，會好深入咁講愛情，咁難免會描述到情侶間嘅親密行為，就好似一對情侶每日都會有親密行為咁。事前April怕我哋尷尬，拍攝親密戲前會預留多啲時間綵排，希望出嚟效果會好同令我哋拍得舒服啲同少啲壓力，好多謝監製佢哋。」
至於Rosita以超熱褲造型、同林景程喺床上親密攬攬之餘，仲向夏莉挑機，最終兩人喺床上大打出手，相當有睇頭。談到同Fyy之戰，Rosita坦言係拍劇突破之一：「我同盈盈決戰咗一個晚上，我拍咁耐劇第一次咁樣同女仔打鬥。」第二大突破係飾演綠茶女，Rosita話知道角色後自己係一口答應：「我估唔到監製會搵我做呢個角色，佢同我以往角色非常唔同，我覺得係幾好嘅嘗試，所以一口答應咗。」對於喺劇中有唔少罵人劇情，Rosita坦言有難度，皆因平時好少同人吵架，更笑言拍劇期間為投入角色辛苦晒親細佬：「我會有事冇事都搵啲嘢同佢鬧吓交，所以都要趁呢個機會同佢講聲對唔住，但我覺得嗰排我同細佬感情反而突飛猛進咗。另外我都有專登留意吓其他演員演鬧交戲嘅眼神。」第三大突破則是與景程的親密床戲。
《妳不是她》25號起 逢星期一至五 20:30 翡翠台