東華2023丨藝人賣力表演善長慷慨解囊 籌得破紀錄1億3千多萬

一年一度大型慈善活動《歡樂滿東華2023》圓滿結束，喺各方藝人賣力演出之後，今年善款數字喺12月17號凌晨1時15分就打破舊年紀錄，而最終總善款係130,888,888。每年都帶住學生為東華演出籌款嘅薛家燕，今年就聯劉詠彤、Honey Bees同super boy跳唱一段長約7分鐘，名為「齊喜樂 家燕姐」嘅表演，家燕姐大讚一班學生個個跳唔喘氣，反而佢就有啲吃力，仲自嘲可能年紀大。講到嚟梗聖誕節點過，佢就話三代同堂一齊去日本玩幾日，家燕姐講到孫仔同行不知幾開心。

兩位樂壇實力前輩陳潔靈同盧冠廷合唱《祈願》，Miss Chan Chan話同盧盧一齊拍過TVB嘅劇集，不過就未試過一齊喺電視節目度唱歌，今次係難得機會，盧盧就話能夠同唱得之人合唱，實在係機會難逢。

丁子朗、冼靖峰、黃奕斌、文佐匡同黃星綽五位《亞洲超星團》練習生，今次就為東華打頭陣跳唱，Archie、Hugo同黃星綽都話好開心可以五子一齊演出，不過文佐匡就為咗演出而緊張到腸抽筋。丁丁自從《亞洲超星團》播出之後令人氣急升，嚟梗聖誕節仲會喺八日去到六個城市出席活動，佢都話擔心自己趕唔切坐高鐵。

關心妍同周吉佩相識多年，首次合作就係為東華籌款，Jade都話見到吉吉多年嚟嘅努力，今日獲得認同，佢話無人比佢更加開心，因為佢哋互相見住彼此成長。吉吉自從奪得《中年好聲音》第一季冠軍後，短短時間就接咗70個演出，吉吉話自己係一個有危機感嘅人，雖然今年工作量理想，但佢會選擇將錢投資喺音樂學校，因為已經係有家室之人，要向太太同仔女負責任。

林沚羿同爸爸林迪安合作嘅「齊歷險 父女同心」籌得80萬，Venus都話經過今次之後，學習到要對自己有信心，要對身邊合作嘅團隊有信任先可以成功，因為高難度動作就係將自己生命交畀身邊團隊。

負傷上陣獻唱嘅伍富橋，佢話之前因為打籃球導致左腳嚴重扭傷，斷十字韌帶，要再到月尾先知可唔可以做手術，為咗減少行路，佢都專登坐住電動行李箱作代表喺電視城入面游走。