台慶劇《新聞女王》踏入結局篇倒數四集，18號晚一集劇情講述Man姐( 佘詩曼 飾)火力全開搞Prime Time改革，欽點Cathy( 高海寧 飾)同王偉( 林正峰 飾)為頭炮主播；改革叫好叫座，但Cathy為咗喺事業覓得更好「歸宿」，決定告別性感，仲喺市場部總監Jeff( 楊證樺 飾)協助下邁向公務員之路，Cathy同Jeff以及王偉之間嘅關係更加係撲朔迷離。
另一條感情線，Slash為咗幫曉薇( 何依婷 飾)追查富二代Cyrus( 孔德賢 飾)非法賽車，遇上嚴重車禍危在旦夕，曉薇極度自責守候喺病房外，Man姐亦因為曉薇情況勾起昔日追訪賊王令男友中槍嘅痛苦回憶…
被眨到紙媒嘅張家妍( 李施嬅 飾)因為執到曉薇電話，意外拍到對Cyrus不利嘅獨家片段，仲以此作為重返SNK Prime Time News籌碼，先後同飛爺( 鄧智堅 飾)、佐治( 馬國明 飾)以及Man姐交涉，事件最終驚動方太( 龔慈恩 飾)，家妍亦似乎得償所願…
今(19日)晚家妍黑化升級，除幫忙掩蓋車禍真相，更會捨棄正義原則斷章取義報道新聞令Slash蒙上污名…
踏入結局周，已經有觀眾大讚劇情再掀高潮，除咗黑化家妍嘅三大談判場面，家妍最後「打大佬」同方太嘅對話亦贏盡好評；今次方太除咗以新一輪「鮮花論」引起注目，最後拎住棋子向家妍一句：「如果你值，方太一定畀」，精警對白配上龔姐運籌帷幄嘅眼神同饒有深意嘅笑容，令觀眾直呼心寒，更指龔姐單憑呢個眼神已能穩奪今屆最佳女配角！
結局周最大高潮除咗黑化家妍會同佐治聯手令SNK翻天覆地，Man姐亦因為十年前嘅賊王事件由高處直跌谷底，就喺Man姐憑改革節目榮獲「年度業界人物」殊榮時，警方直闖頒獎禮現場並將Man姐帶返警署助查；名聲大受影響嘅Man姐最後會開記招宣布辭職兼退出新聞界！
除咗Man姐，仲有兩位靈魂人物會離開SNK，喺蜀中大將買少見少之下，SNK同「新聞專業」將愈走愈遠，關鍵更加係同兩名新加盟主播賴嘉詠( 郭柏妍 飾)同莫詠珊( 李芷晴 飾)有關！而上周「谷底反彈」嘅曉薇亦將於結局周遇上極大衝擊，情緒病惡化走向自殺極端之餘，仲怒摑Man姐瘋狂爆Seed兼驚現恐怖幻覺！
而周五就會播出嘅《新聞女王》大結局，黃宗澤(Bosco)嘅驚喜現身同對白：「我對你呢個新聞女王有興趣，因為喺我領域，只有國王，冇女王」掀起網絡熱話，更有指Bosco亮相係劇組刻意為續集鋪路。對此總監製鍾澍佳受訪時親自拆解疑團，除咗強調Bosco係純彩蛋，更直指呢個安排其實係為咗幫阿佘圓心願：「那真的是個彩蛋，因為阿佘跟我說TVB這麼多男演員，只有一個Bosco她從來沒有真的合作過，然後我就打電話給Bosco，問他有沒有空，就幫我們客串了一場戲。」
《新聞女王》結局篇星期二至五晚 20:30 翡翠台，星期五大結局連播兩小時