「彭氏兄弟」彭順及彭發入行做導演多年，曾執導《見鬼》系列、《無聲火》及《風雲II》等經典作品，今日傳出現年58歲彭發為救患癌病嘅太太散盡家財，向高等法院申請破產。 
據報道指有記者於高等法院門外見到彭發，其直認目前欠債逾二百萬元，彭順及李心潔有伸出援手，此終長貧難顧，佢迫於無奈只好申請破產。彭發與愛妻結婚30年，彭太十幾年前曾患乳癌，今年2月再確診末期肺癌，彭發當時喺內地拍戲，擔心見唔到太太最後一面，情願賠錢離開團隊。
彭發面對醫藥費及生活費一個月近10萬，承受龐大財政壓力，原定彭發6月喺內地開戲，不過拍攝一再改期，由於長期未有收入，佢願意接剪片工作亦未有消息，做導演冇入息證明無法向銀行借錢，只好向財務公司借貸，彭發亦感激阿哥彭順、大嫂李心潔及張兆輝太太伸出援手，合作拍電影《再生人》時，主動先畀一筆導演費應急。