由無綫與優酷聯合製作，謝穎、鍾澍佳總監製、關文深監製嘅TVB台慶劇《新聞女王》，今晚（22 日）8點35分起翡翠台連續兩小時播出第25集及第26集大結局，今晚《新聞女王》台前幕後移師澳門，與現場觀眾一齊睇結局歡渡冬至！
今晚（22日）連續兩粒鐘大結局嘅《新聞女王》，壓軸登場個案人物陳山聰絕對係一大亮點，山聰喺劇中飾演輕度弱智爸爸賴志雄，因女兒嘉嘉離奇墮樓身亡兼一直求助無門，最終捲入持刀及炸彈脅持人質事件，其間更因受刺激令場面一度失控，牽涉其中嘅Man姐（佘詩曼飾）因而身陷險境。結局之前喺優酷率先播出時贏盡好評，有人指山聰好演技令人聯想到劉松仁喺《大時代》經典角色方進新。
山聰一向予人感覺有型有款，呢次放低型仔外表飾演來自基層家庭嘅輕度弱智爸爸，無論舉手投足、表情聲線，甚至係背影入型入格，完全冇半點「陳山聰」味，並演活咗失去女兒嘅痛心、無助及絕望，難怪成功入圍今屆男配角10強。談到是次角色，視帝級山聰坦言頗有難度：「我相信係我入行以嚟其中一個真係都幾難演嘅角色，當時鍾澍佳總監製同我講要拍呢個角色時，我都 『嘩！』我開頭仲同阿佘講我嚟客串同佢玩兩場戲，我諗住好似 Bosco（黃宗澤）咁著套西裝行行企企講兩句對白啫，冇諗過要搞成咁！作為一個演員可以遇到真係有一定難度嘅角色其實係開心嘅。」
雖然只係客串性質，但山聰依然認真對待角色，專誠搵教開方法演技嘅戲劇老師一起研究：「我哋用咗好多時間去諗到底呢個角色嘅輕度弱智要去到幾多呢？點樣分輕重呢？因為大家對陳山聰有固有印象，佢突然做個咁嘅角色大家會唔會認同，如果一做錯咗就會有反效果。」
山聰續指單係為角色造型已好頭痛：「因為之前仲拍緊《奪命提示》，所以髪型有所限，原本係梳落嚟直頭髪，但係點整佢哋係話太有型、想老土啲。真心我依個髪型係我爸爸以前電過，我係參考佢（35年前）嘅髮型。」山聰雖然只係拍咗3日，但感覺就似拍咗「三十集冇分別」：「第一日朝早06起身已經開始入狀態，直至收工返到屋企已經攰到咩咁。第二日繼續，過程辛苦但非常享受。」 山聰感激阿佘：「真心今次唔係因為阿佘我都唔會遇到一個咁好嘅角色，回想 返以前同佢合作，佢已經係超班。今次同佢演咗一場好戲，一如以往佢非常有感染力、好易就畀佢帶到入戲，所以拍攝過程好享受，真心希望將來有機會同佢再玩過。」
台慶劇《新聞女王》大結局 今晚 8 點 35 分起翡翠台連播兩小時