歌唱真人騷《中年好聲音2》24號晚將會播出第七部曲《十八強故事之歌 年終淘汰賽!》，本回合將分成上、下半場進行，18強選手輪流獻唱自選號「故事之歌」，最低分嘅兩位選手將跌入危險區，上、下半場完成後，留喺危險區嘅兩位選手將被淘汰。
今集出場名單有：《特別的愛給特別的你》鄭梓浩、《幸運是我》陳蒨葶、《傷痕》陳燕娜、《一千個傷心的理由》劉可、《完全因你》古淖 文、《至少還有你》王玥、《追》梁浩賢、《給自己的歌》安雅希同埋《傷追人》朱博文。
由於呢次主題係「故事之歌」，18強選手將輪流訴說過去，當中有唔少選手都感觸爆喊，令呢個回合成為眼淚最多嘅一回。獻唱《傷痕》嘅陳燕娜，透露媽媽經歷咗兩段失敗婚姻，間接令佢唔敢投放太多感情喺愛情，佢話：「雖然我好似好硬朗，但內心其實好脆弱，上年我同老公結咗婚，一齊咗八年半，佢令我相信可以依靠男人，但我覺得有少少對佢唔住，因為到今時今日我都未敢 100%投入呢段感情。」燕娜見到在場支持佢嘅老公後忍唔住淚崩，肥媽見到話：「你雖然表演時想喊想喊咁，但係你 Deliver 得好好，唱歌時完全投入大家係 Feel 到嘅。」曾經歷婚姻失敗嘅肥媽仲以金句勉勵：「男人靠得住，豬乸會上樹，但有啲係靠譜嘅。」
參加歌唱比賽入行嘅古淖文獻唱《完全因你》，佢自認過去十分自大狂妄：「嗰時參加比賽冇諗過咁多嘢，點知突然紅咗就覺得自己掂喇，自大嘅性格喺嗰時嚴重咗，當時覺得自己好勁，覺得自己係天王巨星，有個心態係覺得點解人哋會紅過我，明明我都可以上到一線或二線，點解我仲喺度徘徊緊？」去到 2019 年，淖文直言係佢人生最低潮一年，幸好有一位好友將佢從谷底拉出來，佢話：「人未去到絕望時唔會反思，好開心有呢段挫敗令我有機會去反思，只要今日嘅我好過 尋日嘅我少少，我就滿足喇！」感性嘅淖文獻唱完畢後失聲痛哭，相當感觸，伍仲衡表示：「你今日搣甩咗撈嘢味，開始有一種真摯出嚟，繼續努力，你係我睇到其中一位進步緊嘅。」
同樣曾出道做歌手嘅鄭梓浩獻唱《特別的愛給特別的你》送給媽媽，佢透露當年簽約出道前曾遭爸爸極力反對，幸獲媽媽拍心口幫忙簽約，可惜最終卻因敵不過翻版潮選擇退出：「出道時 20 歲，正當想出第三隻碟時，翻版嚟得好突然，資源變少咗，加上屋企要移民，惟有硬住頭皮跟住去。」梓浩坦言移民後將所有身段都放下：「第一份工就係喺菜檔打工，開始時係困難，但同屋企人一齊係最開心嘅、一切都係值得，當中都有失落，就係冇得唱歌！」身為兩子之父的梓浩續指希望為兒子做身教：「想話畀佢哋聽，好多人覺得人到中年有好多框框， 其實唔係，爸爸呢個年紀仍然堅持自己夢想，希望佢哋都會有自己嘅夢想。」
《中年好聲音2》 逢星期日 21:00 翡翠台
