許廷鏗 自組個人公司舉行首個戶外演唱會「SANTA JAMBOREE音楽生活祭リ」聖誕期間於西九文代區嘅竹翠公園舉行。平安夜為咗同歌迷倒數迎接聖誕，Alfred仲安排延遲開騷，不過最後就竟然因為介紹自己嘅CD Boxset太興奮搞到「蝦碌」，踏入凌晨後直至現場觀眾大叫先知道過鐘，非常搞笑。
Alfred為配合聖誕氣氛，穿上胸前有大蝴蝶結嘅粉紅上衣出場，將自己打扮到聖誕禮物一樣獻唱《青春頌》。之後其中幾首歌都跳唱演出，唔少觀眾仲讚Alfred跳勁舞大有進步。唔少觀眾亦起身齊齊又唱又跳，氣氛熱烈。
早前接受完手術嘅 楊安妮 頭場擔任嘉賓，同Alfred合唱《假面具》，Alfred仲嘴賤話非常多謝WinWin服刑(休養)期間依然堅持演出。陳慧敏 亦專誠由澳門來港擔任嘉賓，齊齊合唱《最後一對北極熊 》時現場仲飄下雪花，為觀眾喺平安夜增添節日氣氛。
而吳林峰就以神秘嘉賓身份壓軸出場，同Alfred合唱《童年》，Alfred更爆出同吳林峰有君子協定，承諾以後每隻碟都會有吳林峰嘅作品。吳林峰話 :「好多謝許廷鏗每次喺舞台上都同我分享，第一次俾人聽到我嘅歌聲，或俾人認識我係一個歌手，就係因為有許廷鏗，所以我亦對佢承諾，之後佢有需要我亦一定會幫佢寫歌。」
早前有傳 鄭欣宜 將於Alfred演唱會「復出」，不過Alfred早前已澄清未有其事，而欣宜於平安夜亦出Post，貼出與已故媽媽 肥姐 沈殿霞 嘅合照，指聖誕係同愛人家人同度嘅節日，又稱近日經常夢見媽媽，更奉勸大家珍惜每一次同親人共度嘅時光。
