以多年前真實案件作藍本嘅電影英皇電影《金手指》周六全球公映，新片嘅強大演出陣容仲包括 梁朝偉 劉德華 蔡卓妍 任達華 方中信 姜皓文 錢嘉樂 陳家樂 周家怡 白只 太保 等好戲之人，重現當年紙醉金迷嘅奢侈浮華。
《金手指》亦加入一眾年青演員演出， 陳家樂 同 岑珈其 何啟華 等於戲中組成富二代兵團，同偉仔飾演嘅嘉文集團創辦人兼主席程一言，仲有生意拍檔曾劍橋( 任達華 飾)鬥戲，家樂喺1戲中更同大鱷偉仔有肢體碰撞，又向對方破口大罵，而一身七、八十年代復古造型，仲被導演莊文強指佢似足當年嘅大哥鄧光榮。
家樂於片中飾演華業銀行二少爺何浩雲，被程一言積極招攬入局，及後更因牽涉案件鋃鐺入獄成為階下囚。兩人於一場富豪飯局初見面，玩世不恭又財大氣粗嘅家樂，仲立刻向偉年施展下馬威。
另外一場，家樂驚覺被偉仔拖累而蝕錢，憤而上門闖入酒局，更引發肢體碰撞。家樂為投入演出面無懼色，同兩位影帝硬碰：「其實起初劇本對我要點做寫得唔太仔細，但當我演嘅時候，因為我好嬲就不自覺推咗偉仔一下，導演好鍾意話可以keep住，大力啲都仲得，有導演批准之後我就放膽喇。」
對導演指佢同有學生王子之稱嘅鄧光榮相似，家樂就笑言：「好多工作人員都咁講，我著咗呢套衫，再整埋呢個頭埋位，大家都話好似鄧光榮先生，我覺得好好，鄧光榮係是一位我好喜歡嘅前輩，希望我可以做得更好！」
家樂喺戲中膽生毛頂撞股壇大鱷，階因背後有岑珈其、阿Dee、胡子彤、楊天宇同徐浩昌一隊公子兵團撐腰，今次有機會同偉仔同華哥兩大影帝同場演出，第一次埋位就獲偉仔比足兩個Like鼓勵，但係後來諗真就發現可能大有玄機，珈其話：「完成第一take之後，偉仔再同我哋講加油，不過他只俾一隻手指公，有人解畫話(偉仔暗示)兩隻手指公係俾兩次機會我哋，而家得返一隻，即係只得一次機會，當呢一take過去，偉仔果然冇再豎手指公，只係話加油，哈哈哈……」
珈其於戲中飾演任達華角色嘅公子Johnny，仲令偉仔有深刻印象，佢同導演更曾點名稱讚珈其演出，莊文強話：「年青演員各自面對幾位唔同風格嘅影帝，一樣毫不怯場，新演員一直欠缺參與大製作機會，而大製作往往可以啓發演員進步。希望今次可以令更多觀眾欣賞同認識到佢哋。」