妳不是她丨與丁子朗遇車禍性情大變 馮盈盈被猜測轉性之謎

新劇《妳不是她》以50%奇幻懸疑＋100%貼地角度探討「何謂真愛」，係百分百純港式現代愛情小品。劇集喺前(25日)晚首播就帶出懸念嘅劇情，同居三年嘅林信（丁子朗飾）同夏莉（馮盈盈飾）縱然偶有甜蜜，但由於價值觀相差太遠兼林信太唔成熟，最終因為林信背著夏莉買咗架價值23萬嘅Dream Car兼且疏忽照顧夏莉愛貓Nana，導致兩人吵大鑊兼撞車。

丁子朗發現炒車後女友馮盈盈性格猶如成為另一個人

噚(26日)晚第二集嘅劇情講到林信喺醫院醒番時候，古怪嘅事情發生咗，原屬「黑面內斂管家婆」嘅夏莉，突然變得熱情如火、溫柔體貼兼千依百順，加上連番出現古怪行為，包括由不鍾意亂花錢變成豪爽、支票簽名不對辦、突然又變得好打、同埋忘記自己時裝店位置等…不論網民同觀眾都猜測夏莉「轉性之謎」，有人聯想會唔會同撞車一刻，現場離奇出現嘅藍光有關，估計同時空穿越以及靈魂交換等方向有關。

FYY喺新劇演出有唔少新挑戰

噚(26日)晚一集亦係Fyy晒冷夜，除咗有格調十足嘅「唯美MV式特寫鏡頭」，仲有出浴畫面同打鬥戲。雖然劇中「打鬥戲」並非動作戲水平，但Fyy都有做足功課：「因為我個角色好打得，我有參考到小丑女Margot Robbie，睇吓點樣打起上嚟型啲又靚啲。」被出道時Fyy嘅懶音受盡批評，自從2019年搵嚟言語治療師糾正懶音，同之後喺2021年參加《好聲好戲》接受挑戰之後，Fyy今次喺劇中發音明顯有進步，佢話汪明荃係我主要嘅學習對象：「我好想學佢點樣字正腔圓得嚟又好自然，主要睇吓佢平時主持節目、訪問講嘢時語氣同發音咬字咁，我亦都親身睇過佢做粵劇，順便學埋佢點樣用氣。」

《妳不是她》逢周一至五晚20:30翡翠台