炎明熹與歌迷義工聖誕探訪 為老友記唱歌扭汽球暖心

炎明熹 今年唔止事業發展順利，聖誕期間又先後同聲夢成員再次開騷，呢日又同歌迷會嘅義工隊成員齊齊到老人院探訪，為老友記唱吓歌仔玩遊戲，Gigi同歌迷們仲分別為各位哥哥姐姐戴冷帽同頸巾等聖誕禮物，認真有心呀。

Gigi話因為學業事業兩忙，今次已經係相隔一段時間之後再同歌迷一齊出席活動，加上今次同一班老友記一齊度過溫暖嘅時光，就覺得特別有意義喇。

原來Gigi唔止唱歌叻，呢日亦展現佢扭汽球嘅強項，原來佢自細學過大人小朋友都鍾意嘅手法，仲為今次探訪再特訓，仲話希望往後有更多機會參與唔同義工活動呀。而一班哥哥姐姐一樣非常歡迎Gigi同歌迷們到訪，難怪佢哋都大讚呢個後生女又甜又乖女啦。