草蜢 平安夜現身賭城拉斯維加斯，繼續佢哋巡迴演唱會嘅演出，今年已經先後於台北小巨蛋、美國東、西岸、新加坡、馬來西亞雲頂、澳門同高雄巨蛋表演嘅佢哋，就以呢站為忙碌嘅一年作結，同坐爆全場嘅一眾樂迷迎接充滿歡樂嘅聖誕佳節。
今年係草蜢三子嘅恩師梅艷芳逝世20周年，佢哋除咗特別獻唱同梅姐合唱嘅《夢伴》之外，又喺舞台後方正中央放置Mic Stand紀念。「因為12月30號係阿梅離開我哋第20年，我哋都藉住今次演唱會去懷念佢，同好多愛錫佢嘅人一齊唱《夢伴》。」
蘇志威稱希望將整個演唱會獻予梅姐，回想當年跟梅姐到唔同地方登台，蔡一智就話：「草蜢第一次出埠去美國登台，就係由梅姐帶住我哋，今日再嚟到賭城，感覺好溫暖好濃烈，我覺得阿梅今晚一定喺度同大家過聖誕。」蔡一傑亦都話：「諗起當年同佢周遊列國嘅經歷，相信今晚台下嘅觀眾，當年應該都有睇過我哋一齊表演，係一個大家嘅共同回憶，非常之溫暖。」
草蜢呢晚又同觀眾玩遊戲迎佳節，佢哋喺在台上一邊唱聖誕歌，台下觀眾就一邊傳遞聖誕樹造型嘅綠色聖誕帽並戴到頭上，當音樂一停頭上有聖誕帽嘅觀眾就得到禮物，一位男觀眾雖然幸運得到有草蜢簽名嘅聖誕禮物，但係就被全場觀眾取笑「戴綠帽」，搞到呢位幸運兒同全場一齊捧腹大笑。