電影業界日前表示，喺啱啱過去嘅12月本地電影票房，係20年來最差嘅一年。不過梁朝偉、劉德華、蔡卓妍等主演嘅《金手指》，開畫票房勢如破竹，香港30號單日票房勁破410萬，榮膺2023年聖誕新年檔開畫票房總冠軍；內地票房迅即衝破億元人民幣大關，同步於新加坡與馬來西亞上映亦反應熱烈，分別喺星馬兩地皆成為2023年開畫最高票房嘅港產片。
偉仔衷心感謝入場支持嘅觀眾：「這次角色跟之前所演的反差很大，對我來說是一個挑戰，在創作的過程之中，也花了很多心血，所以希望觀眾會有新鮮感！」華仔亦大感雀躍：「《金手指》是一部好值得紀念的作品，希望不用再等20年，我和梁朝偉又可以再合作！」
偉仔喺戲中飾演傳奇商人程一言，而喺佢步入香港金融戰場前，曾擔任旅行社領隊，仲喺金三角帶團期間遇上當地軍閥開仗。為拍呢場逃難記，偉仔要穿梭炮火之中，為求安全及達到最佳效果，偉仔需要吊威也演出，事前佢就不辭勞苦，同動作導演錢嘉樂以及團隊進行多次演練。由於有爆破場面，偉仔埋位前專心聽錢嘉樂嘅講解同指示，到正式拍攝，偉仔不顧蓬頭垢面，手持公事包左閃右避，更要趴地演出，難怪拍攝幾次後問到偉仔嘅感受時，佢帶笑直言：「好攰呀！」
